დიდ დიღომში გარდაცვლილი 12 წლის გოგონას დედა, ნატო ხუტაშვილი „მთავარ არხთან” საუბრისას აცხადებს, რომ ანას მარცხენა ხელის ფრჩხილში აქვს შავი თმა გაჩხერილი.
„მარცხენა ხელის ფრჩხილში აქვს ბავშვს თმა გაჩხერილი. ეს არის ხვეული, შავი თმა და არანაირად არ არის ჩემი შვილის, რადგან ჩემს შვილს გრძელი ოქროსფერი თმები აქვს. ეს არც იმ ძაღლის თმები არ არის, რომელსაც ეფერებოდა, რადგან მას ოქროსფერი ბეწვი აქვს. ძალიან შეშლილი სახე ჰქონდა, არეული და ანერვიულებული იყო…შეხლა-შემოხლის დროს ბავშვს ეს თმა აქვს გამოგლეჯილი.
გამორბოდა ჩემი მეუღლე, როდესაც ბავშვი ჯერ კიდევ ცოცხალი ეგონა და ის ნაძირალა შემთხვევის ადგილიდან მოდიოდა. მითხრა, მინდოდა მეკითხა რამე, მაგრამ იმდენად შეშლილი სახე ჰქონდა არაფერი აღარ ვკითხეო. სპორტული აღნაგობის ტიპია, ეცვა შავი სპორტულები და იმედი მაქვს ფოტო რობოტის აღდგენას შეძლებენ”, – საუბრობს ანას დედა.
12 წლის ანა იანუშაიტიტეს გარდაცვალების საქმეზე სამხარაულის ექსპერტიზის ეროვნული ბიუროს სასამარათლო-სამედიცინო წინასწარი დასკვნა მზადაა. წინასწარი დასკვნა 28 აპრილს გადაეცა დაზარალებულის უფლებამონაცვლეს, ბავშვის დედას და „უფლებები საქართველოს“ ადვოკატებს.
მომხდარ ფაქტთან დაკავშირებით გამოძიება სისხლის სამართლის კოდექსის 109-ე მუხლით მიმდინარეობს, რაც დამამძიმებელ გარემოებაში განზრახ მკვლელობას გულისხმობს.
ცნობისთვის, დიდ დიღომში 12 წლის მოზარდი გარდაცვლილი მიმდინარე წლის 16 მარტს იპოვეს.