თეატრისა და კინოს რეჟისორი ქეთი დოლიძე კინოცენტრში განვითარებულ მოვლენებს გამოეხმაურა.
მისი თქმით, არაპროფესიონალი კადრების დანიშვნა არ შეიძლება.
„ქართული კინო დამოუკიდებული ყოველთვის იყო, მაგრამ ბოლომდე დამოუკიდებელი ვერ იქნება, თუ არ ეყოლება სპონსორები. არაპროფესიონალები არ შეიძლება და მორჩა. არ შეიძლება ყველგან იყოს იურისტები, გამორიცხულია ეს ამბავი. იურისტი უწყებაში უნდა იყოს ერთი და ხომ არ შეიძლება მთელი საქართველო იურისტებით გაივსოს, არა? რაც ხდება კინოცენტრში, ეგ არის დაუშვებელი. მე მგონია, რომ ეს არ არის კარგი მთავრობისთვის, ზურგში ჩარტყმულ დანას ჰგავს“, – განაცხადა ქეთი დოლიძე „ფორმულასთან“ სატელეფონო საუბარში.
შეგახსენებთ, „ქართული ოცნების“ პროპაგანდისტი და „პოსტივის“ ტელეწამყვანი, ბაჩო ოდიშარია კინოცენტრში კინოწარმოების დეპარტამენტის ხელმძღვანელის მოადგილედ დაინიშნა.
კინოცენტრში რეორგანიცაზია რამდენიმე თვის წინ დაიწყო.
14 მარტს საქართველოს კულტურის, სპორტისა და ახალგაზრდობის სამინისტრომ საქართველოს ეროვნული კინოცენტრის დირექტორი, გაგა ჩხაიძე თანამდებობიდან გაათავისუფლა.
უწყების ცნობით, შიდა აუდიტის სამსახურმა 2019-2020 წლების პერიოდში კინოცენტრში არაერთი დარღვევა აღმოაჩინა, მათ შორის არის ფინანსური რესურსის კანონმდებლობასთან შეუსაბამოდ ხარჯვის ფაქტები, ფინანსური მართვის სისტემის ხარვეზები და სავარაუდო ნეპოტიზმის ფაქტები.
თავად ჩხეიძე ბრალს უარყოფს. ხელმძღვანელის პოსტზე ყოფნის პერიოდში მან არაერთხელ გააკრიტიკა თეა წულუკიანი და კულტურის სამინისტროს ბოლოდროინდელი პოლიტიკა.
ამას თანამშრომლების პროტესტი მოჰყვა, რომელიც დღემდე გრძელდება.