ილიას სამძებრო სამუშაოები აქტიურად მიმდინარეობს, მაგრამ ჯერ რაიმე ახალი დეტალი არ გამოკვეთილა, – ამის შესახებ ილია ფილფანის მამამ დავით ფილფანმა Report.ge-ს განუცხადა. დავით ფილფანის თქმით, ბავშვის დაკარგვის შესახებ ბევრი ვერსია განიხილება და რომელიმეს გამორიცხვა ამ ეტაპისთვის შეუძლებელია.
“ილიას ძებნის პროცესში ამ დრომდე სიახლე არ არის, მას ისევ აქტიურად ეძებენ. მისი გაუჩინარების შესახებ ბევრი ვერსია განიხილება და იქიდან გამომდინარე, რომ 4-თვიანი ძებნის პერიოდში რაიმე ახალი მტკიცებულება არ გამოჩენილა, რომელიმე ვერსიის გამორიცხვა შეუძლებელია. ძებნის პროცესში აქტიურად არის ჩართული ინტერპოლი და საქართველოს შსს. მე შს მინისტრთან პირდაპირი კომუნიკაცია მაქვს, თუმცა სიახლეები ჯერ არა რის” – განაცხადა ილია ფილფანის მამამ.
ცნობისთვის, 13 წლის ილია ფილფანი სახლიდან 18 ივლისს, ველოსიპედით გავიდა და მას შემდეგ არ დაბრუნებულა. ილია ფილფანს ინტერპოლის ყვითელი ცირკულარითაც ეძებენ.
ოჯახმა ბავშვის პოვნისათვის ფულადი ჯილდო დააწესა.
ფაქტზე გამოძიება 143-ე მუხლით მიმდინარეობს, რაც არასრულწლოვნის მიმართ თავისუფლების უკანონო აღკვეთას გულისხმობს წინასწარი შეცნობით.