ბათუმში კორონავირუსით ინფიცირებული პედაგოგი, 55 წლის შორენა ბერიძე, რომელსაც შაქრიანი დიაბეტი ჰქონდა, 37.5 ტემპერატურის და სუნთქვის გაძნელების მიუხედავად, კლინიკის ნაცვლად სასტუმროში გადაიყვანეს. მისი მდგომარეობა 24 საათში კიდევ უფრო დამძიმდა, მეორე დღეს კი შორენა ბერიძე გარდაიცვალა.
როგორც გარდაცვლილი პაციენტის და, დუდანა ბერიძე „ბათუმელებს“ ეუბნება, შორენას კორონავირუსი 4 ოქტომბერს დაუდასტურდა.
„იმ პერიოდში მეც თვითიზოლაციაში ვიყავი და ჩემს დასთან სატელეფონო კონტაქტი მქონდა. სასწრაფო როცა გამოვიძახეთ, არც იმ ღამეს გადაიყვანეს, მიუხედავად იმისა, რომ სიცხე ჰქონდა და სუნთქვაც უჭირდა.
მეორე დღეს ისევ დამირეკა, ცუდად ვარო და ისევ გამოვიძახეთ სასწრაფო. ამის შემდეგ გადაიყვანეს ბათუმის ინფექციურ საავადმყოფოში. როგორც მითხრა, მთელი დღე იყო იქ, გადასხმა გამიკეთეს მეტი არაფერიო და იქედან დღის ბოლოს გადაიყვანეს სასტუმროში. განწირული ხმით მეუბნებოდა, სასტუმროში რა მინდაო. დავამშვიდე, ალბათ ეს არის პროტოკოლი, ნუ გეშინია-მეთქი“, – ამბობს დუდანა ბერიძე.
მისი თქმით, შორენა ბერიძე სასტუმროშიც ცუდად გრძნობდა თავს.
„შაქარი ჰქონდა მაღალი. ამის შემდეგ ისევ გამოვიძახეთ სასწრაფო და იქედან წაიყვანეს ქობულეთის სამედიცინო ცენტრში. ამასობაში ბევრი დრო გავიდა და მდგომარეობა დამძიმდა. 7 ოქტომბერს უკვე გარდაიცვალა. დაგვიანდა ჰოსპიტალიზაცია, ინფექციურიდან პირდაპირ კლინიკაში უნდა გადაეყვანათ და არა სასტუმროში“, – გვითხრა შორენა ბერიძის დამ.