22 წლის გოგოს საქმეზე, რომელსაც ექიმებმა მუცელში მაკრატელი ჩაუტოვეს, ჯანდაცვის სამინისტროს რეგულირების სააგენტომ მოკვლევა დღეს დაიწყო.
მარეგულირებელი უკვე შესულია მარდალეიშვილის კლინიკის ორივე ფილიალში. თბილისიდან და რუსთავიდან გამოითხოვენ ახალგაზრდა ქალის სამედიცინო ისტორიას, საქმის შესწავლის პროცესში გამოჰკითხავენ ექიმებს, რის საფუძველზეც უწყება მოამზადებს დასკვნას, თუ ვის შეუჩერდება სამედიცინო საქმიანობის განხორციელების უფლება.
მარდალეიშვილის კლინიკაში 22 წლის გოგოს, გინეკოლოგიური პრობლემების გამო, რთული ოპერაცია გაუკეთდა, პაციენტი სახლშიც გაწერეს, თუმცა მალევე სამირა კულახმეტოვას ძლიერი ტკივილები დაეწყო.
ახალგაზრდა ქალმა ულტრაბგერითი კვლევა ჩაიტარა, ექოსკოპიის სურათი ყველასთვის შოკის მომგვრელი აღმოჩნდა. ოპერაციის მთავარი იარაღი, 14 სანტიმეტრიანი ქირურგიული დამჭერი- მაკრატელი, ქალის ორგანიზმში დატოვებული იყო.
კლინიკის აღმასრულებელი დირექტორი შეცდომებს აღიარებს და “კურიერთან” ინტერვიუში ამბობს, რომ პასუხისმგებლობას არ გაურბის.
22 წლის გოგოს მეორე ოპერაცია ისევ მარდალეიშვილის კლინიკის, ამჯერად, რუსთავის ფილიალში ექიმების იმავე გუნდმა გაუკეთა. სამირა კულახმეტოვა კლინიკას ორ დღეში დატოვებს. ოჯახი დასკვნას ელოდება.