17 აგვისტოს მესტიაში, კერძოდ სოფელ ლენჯერის შესასვლელთან საპროტესტო აქცია გაიმართა. აქციის მონაწილეები სოფლის ჩაკეტვას აპროტესტებდნენ და ლენჯერის გავლით ავტომანქანებს არც შიგნით და არც გარეთ არ უშვებდნენ. ლენჯერის მოსახლეობის თქმით, სოფლის ასე ჩაკეტვა არ არის სწორი. ადგილობრივები ითხოვენ ზომების შემსუბუქებას.
ადგილზე მივიდა მესტიის მუნიციპალიტეტის მერი კაპიტონ ჟორჟოლიანი. ჟორჟოლიანმა აქციის ერთ-ერთ მონაწილისთვის, რომელიც მუნიციპალიტეტის მერსა და მოსახლეობის საუბარს იღებდა, მობილური ტელეფონის წართმევა სცადა. ფაქტის ამსახველ ვიდეოს ანა ჩართოლანი ავრცელებს.
“პროტესტი სვანეთიდან. ჩვენი გადარევა მარტივი არ გეგონოთ!!!” – წერს ჩართოლანი.
როგორც ვიდეოში ჩანს, ჟორჟოლიანი ინციდენტიდან მალევე ტერიტორიას ტოვებს.
მესტიის მუნიციპალიტეტი 10 აგვისტოს ჩაიკეტა და ამ ტერიტორიაზე შესვლა მხოლოდ ადგილობრივი მოსახლეობისთვის არის შესაძლებელი, მესტიის დატოვების მსურველებს კი 12- დღიანი კარანტინის გავლა მოუწევთ.
მთავრობამ ეს გადაწყვეტილება მას შემდეგ მიიღო, რაც მესტიაში Covid-19-ის 25 ახალი შემთხვევა გამოვლინდა.