მესტიაში, სოფელ ლენჯერში კორონავირუსის 17 შემთხვევა დადასტურდა. ამის შედეგად იზღუდება გადაადგილება როგორც მესტიის მუნიციპალიტეტის მიმართულებით, ისე – მესტიის მუნიციპალიტეტიდანაც. წესდება შეზღუდვები გადაადგილებაზე დაბა მესტიასა და მესტიის სოფლებს შორის.
ადგილობრივი ფოტო კადრებს ავრცელებს, სადაც სოფელ ლენჯერის შესასვლელთან ავტომანქანების მთელი კოლონაა გაჩერებული. პოლიცია არავის უშვებს, როგორც სოფელ ლენჯერში, ასევე მის გარეთაც.
როგორც ადგილობრივები აცხადებენ, პოლიცია ელოდება გარკვეულ ბრძანებას, რის შემდეგაც ტურისტებს გადაიყვანენ საკარანტინო სივრცეში, ხოლო ადგილობრივები თვითიზოლაციაში გადავლენ.
დაბა მესტიაში, უშგულსა და ლენჯერში იფუნქციონირებს მხოლოდ აფთიაქები, საბანკო დაწესებულებები, სასურსათო მაღაზიები და ღია ტიპის საკვები დაწესებულებები.
თავშეყრის ადგილებზე მკაცრად გაკონტროლდება დისტანციის დაცვა, დახურულ სივრცეებში ნიღბების გამოყენება და ხელის ჰიგიენა.
მესტიის მუნიციპალიტეტში ჩატარდება ინტენსიური ეპიდემიოლოგიური კვლევები და ტესტირება, შესვლა-გასვლას კი პოლიცია გააკონტროლებს.
გარდა ამისა, შესაბამისი უწყებები ტურისტების საკარანტინო ზონებში განთავსებას უზრუნველყოფენ. ყველა მოქალაქე, რომელიც დატოვებს მესტიის მუნიციპალიტეტს, გაივლის სავალდებულო კარანტინს.