როგორც უკვე ვწერდით, ხვიჩა კვარაცხელიას წელის ტრავმა აწუხებს და ბერგამოს ატალანტასთან მატჩში ვერ ითამაშებს. კლუბს დაზიანების ხარისხზე ინფორმაცია ამ დრომდე არ გაუვრცელებია, თუმცა, იტალიური მედია გარკვეულ ცნობებს აქვეყნებს. Sky Sport-ის ინფორმაციით, კვარამ წელი დღევანდელი ვარჯიშის ბოლოს დაიზიანა.
სამედიცინო და სამწვრთნელო შტაბებმა შეთანხმებით გადაწყვიტეს, რომ არ გაერისკათ, ვინაიდან სეზონი ძალიან დატვირთულია და წინ კიდევ ბევრი მატჩია. ამჟამინდელი პროგნოზით, ტრავმა სერიოზული არაა და კვარასაც მოედანზე დაბრუნება, რაც შეიძლება სწრაფად სურს. ხვიჩა ატალანტასთან დაისვენებს, მაგრამ იმედოვნებს, რომ სამშაბათს, ემპოლისთან საშინაო შეხვედრაში მონაწილეობას მიიღებს.
შეგახსენებთ, რომ ხვიჩა კვარაცხელიამ მიმდინარე სეზონში 16 მატჩში 8 გოლი გაიტანა, 8 საგოლე პასი გააკეთა და 3 პენალტი მოიპოვა. მან მხოლოდ ერთ შეხვედრაში არ ითამაშა, რეინჯერსის წინააღმდეგ, თუმცა მაშინ ეს სამწვრთნელო შტაბის გადაწყვეტილებით მოხდა.