ფოთის მაჟორიტარ დეპუტატს ირაკლი ხახუბიას, რომელმაც სიცოცხლე თვითმკვლელობით დაასრულა, სოციალურ ქსელში მეგობარი ძალიან სევრდიანი პოსტით ემშვიდობება. ირმა გუგუშვილი წერს, რომ ხახუბიამ შეძლო და ერთ ადამიანს შვილი გადაურჩინა და აუკრძალა ამ ამბის ვინმესთვის მოყოლა, ახლა კი, როცა ის ცოცხალი აღარ არის, მამაკაცმა ფოთის დეპუტატის სიკვდილით გამოწვეული ტკივილი გუგუშვილს გაუზიარა და ეს ისტორიაც უამბო:
“გუშინ დაზაფრულ, ღიმილგამქრალ ქალაქში გამოვედი. ჩემი ქუჩის კუთხეში მეწაღის სახელოსნოა, ერთი მშრომელი და ალალი კაცის.
ხელით მანიშნა, ახლოს მივსულიყავი…ლაპარაკი უნდოდა… ტკივილის გაზიარება უნდოდა.
ნიკაპაკანკალებული მიყვებოდა, მისთვის ურთულეს დღეებზე, როგორ ძმასავით დაუდგა გვერდში ქალაქის დეპუტატი, შესაძლებელთან ერთად შეუძლებელიც რომ შეძლო და გადაურჩინა შვილი… მერე როგორ აუკრძალა მადლიერების გამოხატვა… ამ თემაზე ვინმესთან საუბარიც კი…
იქედან მოყოლებული, როგორ ამბობენ მის ოჯახში იმედის, ადამიანობის, კაცობის, ფოთელობის სადღეგრძელოს ირაკლი ხახუბიას სახით.
მიყვებოდა და თვალები ცრემლებით ევსებოდა….
რამდენი ასეთი ნამდვილი, გულწრფელი სიტყვა და მდუღარე ცრემლი მიჰყვება…
თავად გულგაგლეჯილს, კიდევ რამდენი ტკივილიანი, უსასოო ადამიანის იმედი მიაქვს…
ფოთი მისი ჭირისუფალია…
იმ კაცის თვალებიდან წამოსული ალალი ცრემლებით ტირის ჩემი ქალაქი…” – წერს გუგუშვილი.