მოსკოვში გარდაცვლილი ქართველი მომღერლის ლევან კბილაშვილის დედა, მელიტა ფურცელაძე ჟურნალ „სარკესთან“ შვილის შესახებ საუბრობს და აღნიშნავს, რომ მისი ვაჟი დანის პირზე დადიოდა, რომ ისე ეცხოვრა მოსკოვში, ვინმეს რამე არ ეთქვა და შეურაცხყოფა არ მიეყენებინა.
„თუკი რაიმე ღონისძიება ტარდებოდა საქართველოსთან დაკავშირებით, ყველგან მონაწილეობდა, მოსკოვის ქართულ ეკლესიაში გალობდა და აქტიურად იყო ჩართული ქართულ საქმეში. 12 ივნისს დაბადების დღე ჰქონდა, 31 წლის გახდა. დიდი დაბადების დღე გადაიხადა, მერე კონცერტი ჰქონდა…ამ არანორმალურმა ემოციებმა იმოქმედა ალბათ. ბოლო კონცერტი რომ ჰქონდა, იქ ბიჭებისთვის უთქვამს, სამი თითი მიბუჟდებაო. როგორც ჩანს, უკვე ვერ კარგად იყო და თითებიც ამიტომ უბუჟდებოდა. სისხლის მიმოქცევა დარღვეული ჰქონდა, როგორც ჩანს. ვერავინ წარმოიდგენდა, რომ ეს ამბავი მოხდებოდა. მისი თითების დაბუჟება ალბათ ნერვიულობასა და ემოციებს დააბრალეს.
ლევანის თბილისში გადმოსვენება და ყველა სხვა პროცედურა ლუბა უსპენსკაიამ აიღო საკუთარ თავზე. ბოლომდე უპატრონა. ემირ ემირ კუსტურიცასთან იყო ახლოს და ბრეგოვიჩმა და კუსტურიცამ რომ გაიგეს, ძალიან შეწუხდნენ. მათი დირექტორი ჩამოვიდა ლევანიკოს ორმოცისთის და კიდევ ერთ-ერთი ფესტივალის ორგანიზატორი ქალბატონი, რომელშიც ლევანს უნდა მიეღო მონაწილეობა. მოსკოვში ლევანის ხსოვნის საღამოა დაგეგმილი 3 სექტემბერს. ბრეგოვიჩი კონცერტს გამართავს, რომელსაც ლევანის ხსოვნის საღამო დაერქმევა. ისეთ პროექტს აკეათებენ, რომ ცოცხლად დაუკრავენ და ლევანის ხმას დაადებენ. იმ ქვეყანაში დააფასეს და იქნებ, აქაც გააკეთოს ვინმემ მისი საღამო.
თბილისში კონცერტის ჩატარება ლევანის ოცნება იყო…რომ ჩამოდიოდა, საკონცერტო ტანსაცმელი სულ გამზადებული ჰქონდა, სულ მოლოდინში იყო, რომ ვიღაც დაუძახებდა და სადმე იმღერებდა“ – განაცხადა მელიტა ფურცელაძემ