საქართველოს საკალათბურთო ნაკრების კაპიტანმა თორნიკე შენგელიამ, რომელიც ნიდერლანდებთან მსოფლიოს ჩემპიონატის საკვალიფიკაციო ეტაპის მატჩის მსვლელობისას დაშავდა, გულშემატკივრებს სოციალური ქსელის საშუალებით მიმართა.
“ამ სიტუაციაში ბევრჯერ ვყოფილვარ და უფრო ძლიერიც დავბრუნებულვარ… დარწმუნებული ვარ, ასეთი რთული მომენტები უფრო დიდ მოტივაციას და ძალას შემატებს ჩვენს ბიჭებს…მხარზე მეტად სული მტკივა, რომ ვერ შევძლებ საქართველოს ნაკრების დახმარებას”, – ამბობს თორნიკე შენგელია.
საქართველოს ეროვნული ნაკრების ექიმის, თემო ხვედელიძის განცხადებით, შენგელია შემოწმებას იტალიაში გაივლის და ამის შემდეგ გაირკვევა, დასჭირდება თუ არა მას ოპერაცია.
”დაცემის შედეგად დაზიანდა ლავიწის ძვლის შესახსრები სეგმენტი აკრომიონთან – ეს არის ლავიწის ძვლის დისლოკაცია. გადავწყვიტეთ იტალიაში საუკეთესო სპეციალისტმა გასინჯოს თორნიკე და შემდეგ დაიგეგმოს მკურნალობის მეთოდი. ამ ეტაპზე დამატებითი კვლევები ვერ უტარდება, რადგან შეშუპებაა განვითარებული. ჯერ-ჯერობით არ ვიცით დასჭირდება ოპერაცია თუ მკურნალობას კონსერვატული გზით განვაგრძობთ”, – ამბობს თემო ხვედელიძე.
ცნობისთვის, საქართველოს ეროვნული ნაკრები დღეს იტალიის წინააღმდეგ გამართავს შეხვედრას.