სოფელ უჯარმაში გუშინ ღამით მაშველებმა ძმები, 16 და 20 წლის ნიკა და ივიკო მახარობლიშვილები იპოვეს, რომლებიც არხში დაიხრჩვნენ. ადგილობრივების მონაყოლით, ისინი მამიდაშვილთან ერთად მდინარეზე საბანაოდ წავიდნენ, რა დროსაც, უმცროს ძმას სავარაუდოდ, ფეხი დაუცდა, მეორე კი წყალში მის გადასარჩენად გადახტა, თუმცა, ნაპირზე გამოსვლა ვერც ერთმა ვეღარ შეძლო.
ნიკას უახლოესი მეგობარი თორნიკე ყრუაშვილი “პრაიმტაიმს” უბედური შემთხვევის შედეგად დაღუპული ძმების შესახებ ესაუბრა.
“არ შემიძლია ნიკაზე წარსულში ლაპარაკი, ჯერ კიდევ არ ვარ გონზე… 24 საათი ყველაფერს ერთად ვაკეთებდით, ჩათვალეთ, რომ ტყუპისცალი დავკარგე. ნიკა მალე 21 წლის გახდებოდა, დაბადების დღის აღსანიშნავად ემზადებოდა. ნიკასნაირი პატიოსანი, მოწესრიგებული, ჭკვიანი, მეგობრული ადამიანი იშვიათია.
პირველი კურსიდან სტიპენდიას იღებდა, წერდა სამეცნიერო სტატიებს და სტუდენტურ ცხოვრებაშიც აქტიურად იყო ჩართული. მასზე მხოლოდ კარგის თქმა შემიძლია.
ივიკო მე-12 კლასში გადავიდა. ორივე არაჩვეულებრივი ბიჭი იყო.
ნიკას და ივიკოს ერთი პატარა ძმა დარჩათ. ეს უდიდესი ტრაგედიაა, რთულად გადასატანი”, – ამბობს თორნიკე ყრუაშვილი.