ბათუმის საერთაშორისო აეროპორტი 2026 წლის ბოლომდე 1,3 მილიონზე მეტ მგზავრს მოემსახურება. TAV Georgia-ს პროგნოზით, ეს წინა წლის ანალოგიურ პერიოდთან შედარებით დაახლოებით 10%-იანი ზრდაა.
მიმდინარე წლის საავიაციო სეზონის შედეგები და აეროპორტების ოპერაციული მაჩვენებლები TAV Georgia-ს ორგანიზებით გამართულ აეროპორტის ოპერირების კომიტეტის სხდომაზე შეაჯამეს.
კომპანიის ინფორმაციით, თბილისის საერთაშორისო აეროპორტში წლის ბოლომდე 5,4 მილიონზე მეტი მგზავრია მოსალოდნელი, რაც გასული წლის მაჩვენებელს დაახლოებით 1%-ით აღემატება. ორივე აეროპორტის ჯამური მგზავრთნაკადი 6,7 მილიონს გადააჭარბებს.
წარდგენილი მონაცემებით, რეისების რაოდენობა თბილისში დაახლოებით 3%-ით, ბათუმში კი 12%-ით გაიზრდება.
ამჟამად თბილისიდან ფრენები 80 მიმართულებით სრულდება, ბათუმიდან კი 41 მიმართულებით.
2026 წელს ბათუმის საერთაშორისო აეროპორტში ყველაზე მეტი, 118 რეისი 3 სექტემბერს შესრულდა. მგზავრთნაკადის დღიური რეკორდი კი 13 აგვისტოს დაფიქსირდა, როდესაც აეროპორტი 11 005 მგზავრს მოემსახურა.
თბილისის საერთაშორისო აეროპორტში რეისების რეკორდული რაოდენობა 9 აგვისტოს დაფიქსირდა – 206 რეისი, ხოლო ყველაზე მეტი მგზავრი, 23 483 ადამიანი, 16 აგვისტოს მიიღეს.