საქართველოს ეროვნული ნაკრების გამოცდილი ფორვარდი, ბექა ბურჯანაძე კარიერას ესპანურ კლუბ „კახა 87-ში“ გააგრძელებს. ესპანეთის რანგით მეორე ლიგაში მყოფმა კლუბმა ოფიციალური განცხადება უკვე გაავრცელა და ქართველი კალათბურთელის ტრანსფერი საჯაროდ დაადასტურა.
აღსანიშნავია, რომ ეს გადაწყვეტილება ბექასთვის განსაკუთრებით ემოციური და სიმბოლურია, რადგან „კახა 87“ (იგივე „კახასოლი“, როგორც მას წლების წინ უწოდებდნენ) ზუსტად ის გუნდია, სადაც ბურჯანაძის პროფესიული საკალათბურთო კარიერა დაიწყო. 2011-დან 2014 წლამდე სამი სეზონი გაატარა. სევილიური გუნდის მაისურით მან არაერთი წარმატებული სეზონი ითამაშა და ახლა უკვე დიდი გამოცდილებითა და ლიდერის სტატუსით ბრუნდება.
ბექა ბურჯანაძემ საქართველოს ნაკრების შემადგენლობაში ზაფხულის შეკრებების დროს მიღებული ტრავმის გამო აგვისტოსა და სექტემბრის მნიშვნელოვანი ოფიციალური მატჩები გამოტოვა. გასული თვეების განმავლობაში ის აქტიურად ცდილობდა ფორმის აღდგენას, ინდივიდუალურად ვარჯიშობდა და სრული მზადყოფნით უბრუნდება დიდ საკალათბურთო სარბიელს.
„კახა 87“ ესპანეთის რანგით მეორე დივიზიონში ასპარეზობს და 6 ტურის შემდეგ 3-3 მოგება-წაგებით ცხრილის შუაში იმყოფება. ესპანური კლუბი სოციალურ ქსელში გავრცელებულ პოსტში ბექას დაბრუნებას დიდი სიხარულით შეხვდა და წარმატებები უსურვა: „ქართველი მძიმე ფორვარდი სახლში ბრუნდება, რათა თავისი ლიდერობა და გამოცდილება შესძინოს გუნდს. კეთილი იყოს შენი დაბრუნება სევილიაში, ბექა!“.
თავად კალათბურთელმაც მოკლედ და ზუსტად შეაჯამა თავისი დაბრუნება კლუბის ოფიციალურ წერილში გამოქვეყნებული ფრაზით: „He vuelto“ („მე დავბრუნდი“).