ევროკომისია დღეს “2026 წლის გაფართოების პაკეტს” წარადგენს, რომელიც კანდიდატი ქვეყნების, მათ შორის საქართველოს შესახებ ანგარიშს მოიცავს. პაკეტში შეფასებულია თითოეული კანდიდატი ქვეყნის მიერ ევროკავშირის წევრობისთვის საჭირო რეფორმების განხორციელების პროცესი.
მმართველი გუნდის განცხადებით, ანგარიში იდენტურად იმეორებს გასული წლების შინაარსს და დოკუმენტი გაჯერებულია ევრობიუროკრატების ტენდენციური მიდგომებით. მათ შორის, ძალადობრივ აქციებში მონაწილე იმ პირების მიმართ, რომლებმაც დანაშაული უკვე თავად აღიარეს და საპროცესო შეთანხმებებიც ითხოვეს.
“ქართულ ოცნებაში” აცხადებენ, რომ მაშინ, როდესაც საფრანგეთი “მოლოტოვის კოქტეილის” სროლისთვის უვადო პატიმრობას ითხოვს, ევროკომისია საქართველოში ასეთ პირებს თვითნებურად დაკავებულებს უწოდებს.
გაფართოების ანგარიშში მოთხოვნილია, რომ მოსამართლეები უცხოელების მონაწილეობით დანიშნონ, რასაც მმართველი გუნდი დამოუკიდებელ სასამართლოზე ზეწოლად და შიდა საქმეებში ჩარევად აფასებს.
“საუბარია მოსამართლეების უცხოეთიდან დანიშვნაზე. ჰკითხონ ქართველ ხალხს, სურთ თუ არა ქართული მართლმსაჯულება დაკომპლექტდეს უცხოეთიდან. ეს ცალსახად მიუღებელია ყველა ქართველისთვის. ასევე ამ ანგარიშში საუბარია ძალადობრივი აქციების დროს დაკავებულ ადამიანებზე იმ ფონზე, როდესაც ჩვენ ყოველდღიურად ვუყურებთ ერთმანეთის მიყოლებით, როგორ აფორმებენ საპროცესო შეთანხმებებს აღიარების, მონანიების და ჩადენილი დანაშაულის გაანალიზების შემდეგ. მაშინ, თავად დაგვისახელონ, რა არის ამაში უსამართლო, როდესაც ადამიანი თავად აღიარებს ჩადენილ დანაშაულს. ასე რომ, ბრიუსელმა სჯობს შეცვალოს მიდგომა, დამოკიდებულება და გადაერთოს საქმიან ურთიერთობაზე”, – აცხადებს პარლამენტის საფინანსო-საბიუჯეტო კომიტეტის თავმჯდომარის პირველი მოადგილე ირაკლი ხელაძე.