3 ნოემბერს უკრაინის ქალაქ დნიპროზე მიტანილი იერიშის შედეგად რუსეთის საოკუპაციო ძალებმა, სხვა ობიექტებთან ერთად, პალიატიური მზრუნველობის ცენტრიც დააზიანეს.
“განადგურებული პალიატიური მზრუნველობის ცენტრიდან უკურნებელი სენით დაავადებული 50-მდე პაციენტი ამჟამად ქალაქის სხვა საავადმყოფოებში გადაჰყავთ. მათ შორის ყველაზე ხანდაზმული 90 წლისაა.
სულ ცოტა ხნის წინ ქალაქმა ამ სამედიცინო დაწესებულებაში პალატები და სხვა სივრცეები გაარემონტა. როგორც დნიპროელებისთვის, ისე ჩვენი დევნილებისთვის ეს ერთ-ერთი იმ მცირერიცხოვან ადგილთაგანი იყო, სადაც ასეთი პროფილის დახმარებასა და მზრუნველობას უწევდნენ. ახლა კი ეს ყველაფერი რუსულმა რაკეტამ გაანადგურა” – განაცხადა დნიპროს მერმა ბორის ფილატოვმა ტელეგრამზე.
მერის განცხადებით, დნიპროში სულ 20 საცხოვრებელი სახლია დაზიანებული და ნაწილობრივ დანგრეული.
რუსული დარტყმების შედეგად გიმნაზია, საბავშვო ბაღი, სამუსიკო სკოლა, ბიბლიოთეკა, კულტურის სახლი და მსოფლიო ბანკის ამბულატორიაა დაზიანებული.
