საკონსტიტუციო სასამართლოში 5 ოპოზიციური პარტიის აკრძალვის საკითხზე სარჩელის განხილვა განახლდა. სხდომაზე შესვენება იყო გამოცხადებული. სასამართლო ახსნა-განმარტების ეტაპზეა. პროცესზე სიტყვის უფლებით “ნაციონალური მოძრაობის” წარმომადგენლები სარგებლობენ. ანა წითლიძემ იმ საქმეებზე ისაუბრა, რომლებიც “ნაციონალური მოძრაობის” წინააღმდეგ სარჩელშია შესული და რომლებზეც სასამართლოს გადაწყვეტილებებია დამდგარი, მათ შორის სტრასბურგში. საუბარი იყო გირგვლიანის, აფრასიძეების, როინ შავაძის, იური ვაზაგაშვილის და კოდორის სპეცოპერაციის საქმეებზე. მმართველი გუნდის შეფასებით, ყოფილი სახელისუფლებო პარტიის წარმომადგენლები სისტემური დანაშაულების გამართლებას ცდილობენ.
პარლამენტის იურიდიულ საკითხთა კომიტეტის თავმჯდომარე არჩილ გორდულაძის განცხადებით, ლევან ბეჟაშვილის განცხადება პარტიის გაუქმების შემთხვევაში მის მიერ წარდგენილი დეპუტატების მანდატების ავტომატურად შეწყვეტის შესახებ სიმართლეს არ შეესაბამება. მისი განმარტებით, პარლამენტის წევრის უფლებამოსილების შეწყვეტა მხოლოდ პარლამენტის გადაწყვეტილებით არის შესაძლებელი.
„ლევან ბეჟაშვილი საუბრობს, როდესაც პარტია გაუქმდება, ავტომატურად უქმდება ამ პარტიის მიერ წარდგენილი პარლამენტის წევრების მანდატებიო. ტყუილია. ასეთი ცვლილება საერთოდ კანონში არ წერია – ერთი და მერე მეორე -კონსტიტუციის პირდაპირ წინააღმდეგო იქნება იმიტომ, რომ პარლამენტის წევრის უფლებამოსილების შეწყვეტა ავტომატურად არ ხდება, შესაძლებელია მხოლოდ და მხოლოდ პარლამენტის გადაწყვეტილებით. საკანონმდებლო ცვლილებებში გაწერეს, რომ გაუქმებული პარტიის ქონება გადადის სახელმწიფო ხაზინაშიო და ეს ყველაფერი “ქართულმა ოცნებამ” 2025 წელს გააკეთაო. ტყუილია, ასეთი ჩანაწერი ამ კანონის მიღებისთანავე, ანუ 1997 თუ 1996 წლიდან არსებობს, 30 წელია, ეს ჩანაწერი არის”, – აცხადებს პარლამენტის იურიდიულ საკითხთა კომიტეტის თავმჯდომარე არჩილ გორდულაძე.