„ნაცები“ სხდომის მიმდინარეობის დროსაც კი ყოველ წამს და ყოველ წუთს ამტკიცებენ, რომ მათი მიზანი არ შეცვლილა – საზოგადოება კიდევ ერთხელ რწმუნდება, რომ „ნაციონალური მოძრაობა“ უნდა აიკრძალოს, მათ შორის, სასამართლო პროცესის მიმდინარეობისას ნათქვამი საფრთხის შემცველი განცხადებების გამო, – ამის შესახებ „ქართული ოცნების“ დეპუტატმა, არჩილ გორდულაძემ ჟურნალისტებთან განაცხადა.
მისივე თქმით, „ნაციონალური მოძრაობის“ წევრებს წარბიც კი არ უტოკდებათ და სასამართლოს სხდომის მიმდინარეობის დროსაც კი არ ამბობენ, რომ „ჩადენილ დანაშაულებს ინანიებენ“.
„ანა წითლიძემ დღეს მიხეილ სააკაშვილის ნათქვამი გაიმეორა. მიხელ სააკაშვილმა სასამართლო პროცესის მიმდინარეობისას, დარბაზში თქვა, რომ კარგი იქნებოდა გაგვესამართლებინა როინ შავაძეო – ის ადამიანი, რომელიც მოკლეს. იმიტომ რომ დანაშაულს ჩადიოდა, კარგი იქნებოდა გაგვესამართლებინაო. ანა წითლიძემ აფრასიძეებზე თქვა, რომ ისინიც დანაშაულს ჩადიოდნენო. მან ამით გაამართლა ამ ოჯახის მიმართ ის ქმედებები, რითაც ბარამიძე ამაყობს, რომ კიდევ უფრო მეტი ძალა უნდა გამოგვეყენებინაო, კიდევ უფრო მეტი ვერტმფრენი უნდა მიგვეყვანა და მძინარე ბავშვებით სავსე სახლი კიდევ უფრო მეტად უნდა დაგვებომბა და გადაგვეცხრილაო. რაც შეიძლება მეტი უნდა ილაპარაკოს. მიუხედავად იმისა, რომ საზოგადოებისთვის ძალიან მძიმე მოსასმენია, რასაც „ნაცები“ საუბრობენ, სხდომის მიმდინარეობის დროსაც ისინი ყოველ წამს და ყოველ წუთს ამტკიცებენ რომ მათი მიზანი არ შეცვლილა – მათგან მომავალი საფრთხე არის მყისიერი და ხელისუფლებაში რომ დაბრუნდნენ, ზუსტად ისევე დაამხობენ კონსტიტუციურ წყობილებას, ისე გათელავენ ადამიანის უფლებების, ისე ფეხქვეშ გაიგდებენ ადამიანებს და სისხლის კალოებს დაატრიალებენ. მათ ახლა წარბიც კი არ უტოკდებათ და სხდომის მიმდინარეობის დროსაც კი არ ამბობენ, რომ ისინი ინანიებენ თავიანთ ჩადენილ დანაშაულებს. პირიქით, ამბობენ რომ დემოკრატიის შუქურა იყო თურმე, საქართველო 2004-2012 წლებში და ეს საერთაშორისო ანგარიშებით დასტურდებაო. ერთია ეს ე.წ. ანგარიშები და მეორეა სტრასბურგის სასამართლოს გადაწყვეტილებები. საზოგადოება კიდევ ერთხელ რწმუნდება, რომ „ნაციონალური მოძრაობა“ უნდა აიკრძალოს, მათ შორის, სასამართლო პროცესის მიმდინარეობისას ნათქვამი საფრთხის შემცველი განცხადებების გამო,“ – განაცხადა გორდულაძემ.