პრეცედენტი, რომ მთელი პოლიტიკური ოპოზიცია ერთ სასამართლო პროცესში, ერთ დავაში, ერთ სარჩელში გაერთიანებული ყოფილიყოს, მსოფლიოს არ ახსოვს, – ამის შესახებ „ლელო – ძლიერი საქართველოს“ წევრმა, გიორგი სიორიძემ განაცხადა.
მისივე თქმით, არსებობს საფრთხე, ქვეყანაში ერთპარტიული დიქტატურა დაკანონდეს.
„პრეცედენტი, რომ მთელი პოლიტიკური ოპოზიცია ერთ სასამართლო პროცესში, ერთ დავაში, ერთ სარჩელში გაერთიანებული ყოფილიყოს, მსოფლიოს არ ახსოვს. არცერთი ქვეყნის ეროვნული კანონმდებლობის და სასამართლოს პრაქტიკა არ იცნობს ამას და არც საერთაშორისო სასამართლოების. მით უმეტეს პრეცედენტული არის ჩვენი ქვეყნისთვის. იქიდან გამომდინარე, რომ ჩვენს შემთხვევაში საქმე ეხება მილიონი ქართველისთვის არჩევანის რეალურად წართმევას, საფრთხე დგება, პრაქტიკულად ერთპარტიული დიქტატურის დაკანონების.
არც საკანონმდებლო ჩარჩო არის პროცედურულად ისე დეტალურად გაწერილი და არც ის სტანდარტები, რომელიც არსებობს ჩვენს ეროვნულ კანონმდებლობაში და არც საერთაშორისო სტანდარტები არ არის აქ დაკმაყოფილებული. საკონსტიტუციო სასამართლოს შეუძლია, კონსულტაციისთვის მიმართოს სტრასბურგის სასამართლოს, თუმცა ეს არ დააკმაყოფილა“, – განაცხადა სიორიძემ.
ცნობისთვის, საკონსტიტუციო სასამართლომ არ დააკმაყოფილა „ლელოს“ შუამდგომლობა, ხუთი პარტიის აკრძალვაზე სარჩელი საკონსულტაციო დასკვნისთვის სტრასბურგში გაეგზავნათ.