საქართველოში სეზონური გრიპის საწინააღმდეგო ვაქცინაცია დაიწყო. აცრა ქვეყნის მასშტაბით ყველა მოქალაქისთვის უფასოა და სრულად სახელმწიფოს მიერ ფინანსდება.
ჯანდაცვის სამინისტროს ინფორმაციით, იმუნიზაციის სახელმწიფო პროგრამის ფარგლებში საქართველომ საფრანგეთში წარმოებული სეზონური გრიპის საწინააღმდეგო ვაქცინის — Vaxigrip-ის 200 000 დოზა შეიძინა. ვაქცინა სამკომპონენტიანია და მწარმოებელია SANOFI WINTHROP INDUSTRIE.
უწყების ცნობით, ვაქცინა მორგებულია გრიპის იმ შტამებზე, რომელთა გავრცელებაც მიმდინარე სეზონზეა მოსალოდნელი. აცრა ვაქცინაციის სერვისის მიმწოდებელ სამედიცინო დაწესებულებებსა და პოლიკლინიკებშია შესაძლებელი. ვაქცინაცია 6 თვის ასაკიდან ტარდება და მოქალაქეებისთვის სრულად უფასოა.
განსაკუთრებით მნიშვნელოვანია აცრა გრიპის გართულებების მაღალი რისკის მქონე ჯგუფებისთვის. მათ შორის არიან:
ქრონიკული დაავადებების მქონე პირები;
ონკოლოგიური პაციენტები;
ორსულები;
60 წლისა და უფროსი ასაკის მოქალაქეები;
სამედიცინო პერსონალი;
თავშესაფრებისა და პანსიონატების ბენეფიციარები და თანამშრომლები.
ჯანდაცვის სამინისტროს განმარტებით, გრიპის საწინააღმდეგო ვაქცინაცია განსაკუთრებით მნიშვნელოვანია რისკჯგუფებისთვის, რადგან მათ შემთხვევაში ინფექციამ შესაძლოა მძიმე გართულებები გამოიწვიოს.
სეზონური გრიპის საწინააღმდეგო აცრის ჩატარება მოქალაქეებს ვაქცინაციის პროგრამაში ჩართულ სამედიცინო დაწესებულებებსა და პოლიკლინიკებში შეუძლიათ.