დევნილთა ფულადი კომპენსაციით დაკმაყოფილების პროგრამის ფარგლებში განაცხადების მიღება აქტიურად მიმდინარეობს. პროცესი დღეს დაიწყო და 2 ნოემბრის ჩათვლით გაგრძელდება. დევნილ ოჯახებს განაცხადის წარდგენა ქვეყნის მასშტაბით, იუსტიციის სახლებსა და საზოგადოებრივ ცენტრებში შეუძლიათ, სადაც დილიდან ხალხმრავლობა და რიგებია.
პროგრამაში მონაწილეობა ნებაყოფლობითია და მასში ჩართვა შეუძლია ყველა იმ დევნილ ოჯახს, რომელსაც სახელმწიფოსგან საცხოვრებელი ფართი ან შესაბამისი ფულადი კომპენსაცია არ მიუღია. კომპენსაციის ოდენობა ოჯახის თითოეულ დევნილ წევრზე 10 ათასი ლარია.
დევნილთა, ეკომიგრანტთა და საარსებო წყაროებით უზრუნველყოფის სააგენტოს დირექტორის დავით კაიკაციშვილის თქმით, პროგრამაში მონაწილეობა შეუძლიათ დევნილ პირებს, რომლებსაც სახელმწიფოს განსახლების სხვა პროგრამებით ჯერ არ უსარგებლიათ.
განცხადებების შევსება ქვეყნის მასშტაბით მოქმედ ნებისმიერ იუსტიციის სახლშია შესაძლებელი და პროცესი ორი კვირის განმავლობაში გაგრძელდება.
“დღეს დაიწყო განცხადების მიღება გასულ კვირას დაანონსებულ ახალ პროგრამაზე. ამ პროგრამის ფარგლებში განცხადების შევსება შეუძლია ყველა იმ დევნილ პირს, რომელსაც სახელმწიფოს მხრიდან არ უსარგებლია დღემდე განსახლების სხვა პროგრამებით. განცხადების შევსება შესაძლებელია ქვეყნის მასშტაბით მოქმედ ნებისმიერ იუსტიციის სახლში და გაგრძელდება 2 კვირის განმავლობაში. ამ პროცესის დასრულების შემდეგ სააგენტო დაამუშავებს განცხადებებს”, – აცხადებს დევნილთა, ეკომიგრანტთა და საარსებო წყაროებით უზრუნველყოფის სააგენტოს დირექტორი დავით კაიკაციშვილი.