“პარტიების აკრძალვაში კარგი და ხალხისთვის სასარგებლო არაფერია” – თავისუფალი ხალხის პარტია

თავისუფალი ხალხის პარტია (ყოფილი გირჩი) ოპოზიციური პარტიების აკრძალვასთან დაკავშირებით საკონსტიტუციო სასამართლოში სხდომების ჩანიშვნას გამოეხმაურა.

“აკრძალვის კანდიდატ პარტიებს შორის ისეთებიც არიან, რომლებიც ჩვენზე მეტად, შეიძლება, სამყაროში არც არავის ეჯავრებოდეს, მაგრამ ჩვენ მათი აკრძალვის წინააღმდეგი ვართ. მიგვაჩნია, რომ ამაში კარგი და ქართველი ხალხისთვის სასარგებლო არაფერია.

პარტია პარტიას სიტყვით უნდა უპირისპირდებოდეს და არა ტლანქი პოლიციური ძალით, რადგან მთავრობის მიერ პარტიების აკრძალვა სხვა არაფერია, თუ არა განსხვავებული სიტყვისა და აზრის დევნა. სიტყვისა და აზრის თავისუფლების გარეშე კი თავად თავისუფლების იდეა ფუჭი ილუზიაა, ხოლო ჩვენი ჰიმნის სიტყვები „დიდება თავისუფლებას“ ფარისევლობა”. – წერია პარტიის განცხადებაში.

ცნობისთვის, თავად თავისუფალი ხალხის პარტია ქართულ ოცნებას “ასაკრძალი პარტიების სიაში” არ შეუტანია.

საქართველოს საკონსტიტუციო სასამართლო ოპოზიციური პარტიების აკრძალვის შესახებ ქართული ოცნების მიერ მომზადებულ საკონსტიტუციო სარჩელს 21, 22 და 23 ოქტომბერს განიხილავს.

განიხილება სარჩელი პოლიტიკური პარტიების “ერთიანობა – ნაციონალური მოძრაობა”, “კოალიცია ცვლილებისთვის გვარამია-მელია-გირჩი-დროა”, “ძლიერი საქართველო – ლელო, ხალხისთვის, თავისუფლებისთვის!”, “პარტია ფედერალისტები”, “გახარია საქართველოსთვის” – საქმიანობის კონსტიტუციურობისა და აკრძალვის საკითხზე.