სტადიონის წინ მომხდარი ინციდენტის გახმაურების შემდეგ, გორის მერიის ინსპექციის თანამშრომლების მხრიდან მოზარდებზე ზეწოლის ახალი ფაქტები ხდება ცნობილი. ინსპექციის ადმინისტრაციაში კი, ამის შესახებ, არაფერი სმენიათ – ინფორმაციას “ქართლის ამბები” ავრცელებს.
მაგალითად, წმინდაწყლის დასახლებაში, ,,ეკონოშოპის” მაღაზიის წინ ავტობუსიდან ჩამოსულ 14-15 წლის მოზარდებს კონტროლიორი დაედევნა, შემდეგ აღმოაჩინეს, რომ არასრულწლივნები იყვნენ.
ინციდენტების შესახებ მოქალაქეები სოციალურ ქსელში წერენ. მათი ცნობით, ,,ეკონომშოპის” წინ ბავშვებს გადატვირთულ ქუჩაზე გადარბენა მოუწიათ, ბავშვებს მოქალაქეები გამოესარჩლნენ და მერიის ინსპექციის თანამშრომლებს შეახსენეს, რომ მოზარდებთან ჰქონდათ საქმე, თუმცა პასუხად მიიღეს, რომ სხვის საქმეში არ ჩარეულიყვნენ.
„50 თეთრის გამო ბავშვს გული გაუხეთქე“ – წერს კიდევ ერთი მოქალაქე, რომ მის შვილს კონტროლიორებმა არ დაუჯერეს, როდესაც ბავშვმა განუმარტა, რომ არასრულწლოვანი იყო, და ასაკის გადასამოწმებლად პოლიცია გამოიძახეს.
მშობლები და მოქალაქეები გორის მერიისგან განმარტებებს ელიან. მათი კითხვებია: რა წესით უნდა იმოქმედოს კონტროლიორმა, როდესაც მგზავრი არასრულწლოვანია? რა პროცედურით ხდება ასაკის გადამოწმება და ჯარიმის დაკისრება? მოწმდება თუ არა კონტროლიორების ქცევასთან დაკავშირებული საჩივრები?