კანისა და ვენერიულ დაავადებათა დისპანსერის დირექტორის, გიორგი გალდავას დაჭრის ფაქტზე დაკავებული მედიკოსი, თეიმურაზ ბეჟანიძე ბრალს აღიარებს.
როგორც 80 წლის ექიმის ადვოკატმა “ტვ პირველს” განუცხადა, დაპირისპირება კონდინციონერის პულტის გამო, ბეჟანიძის კაბინეტში დაიწყო.
“დაზარალებულმა გადაიყვანა სხვა კაბინეტში, იქ კონდინციონერი არ იყო და ვუთხარი იქ ჩემს კონდინციონერს გადავიტანო და ამის უფლება არ მომცაო. კლინიკას არ შეუყიდია ეს კონდინციონერი და ვინაიდან მისი ნაყიდი იყო, სწორედ ამიტომ არ აძლევდა პულტს და ეუბნებოდა, პულტს დაგიბრუნებ იმ შემთხვევაში თუ ჩემს კონდინციონერს დამიბრუნებ ჩემს ოთახში, ან ახალ კონდინციონერს დამიმონტაჟებო. მაგრამ არც ერთი მოხდა და არც მეორე”, – აცხადებს დაკავებულის უფლებამდამცველი.
ადვოკატის თქმით, ამის შემდეგ, თეიმურაზ ბეჟანიძე დირექტორმა სამსახურიდან გაათავისუფლა, რის შემდეგაც, მისივე თქმით, ის გიორგი გალდავას დაშინების მიზნით ესროლა.
“ხელმძღვანელმა იურისტის პირით შეუთვალა, რომ გათავისუფლებული ხარ სამსახურიდანო, ამის შემდეგ, როგორც თვითონ განმარტავს, იქიდან წამოვიდა შეურაცხყოფა და ამ სიტყვიერი შეურაცხყოფის შემდეგ მან ეს იარაღი, რომელიც თან ჰქონდა ამოიღო და დაშინების მიზნით განახორციელა გასროლა. თვითონ ამბობს, რომ მე ამაში ხელს ვერავინ შემიშლიდა, რადგან წინ მედგა, მაგრამ გავისროლე სხვა მიმართულებითო, მარჯვენა მხარეს და აი იქ უკვე რა მოხდა არ ვიციო“. – ამბობს ადვოკატი.
დაჭრილს, სასწრაფო ოპერაცია ჩაუტარდა და ექიმის განცხადებით, მძიმე, მაგრამ სტაბილურ მდგომარეობაშია. რაც შეეხება დაკავებულს, მას ბრალი განზრახ მკვლელობის მცდელობის მუხლით აქვს წაყენებული, რაც 10-დან 15 წლამდე ვადით თავისუფლების აღკვეთას ითვალისწინებს.