კანისა და ვენერიულ დაავადებათა დისპანსერის დირექტორის, გიორგი გალდავას დაჭრის ფაქტზე შსს-მ ერთი პირი დააკავა. არსებული ინფორმაციით, დაკავებული მისი კოლეგა – 80 წლის ექიმი თეიმურაზ ბეჟანიძეა.
როგორც ცნობილი ხდება, დაპირისპირება სწორედ მის კაბინეტში მოხდა, რასაც გალდავას მისამართით გასროლა მოჰყვა.
“გამოძიებით დადგინდა, რომ ბრალდებულმა მიმდინარე წლის 5 აგვისტოს, თბილისში, ერთ-ერთ სამედიცინო დაწესებულებაში, ურთიერთშელაპარაკების ნიადაგზე, ამავე დაწესებულების დირექტორი – 1972 წელს დაბადებული გ.გ. ცეცხლსასროლი იარაღიდან გასროლით დაჭრა. სამართალდამცველებმა ბრალდებული მომხდარიდან მალევე, ცხელ კვალზე დააკავეს. დანაშაულის ჩადენის იარაღი ნივთმტკიცებადაა ამოღებული. გამოძიება საქართველოს სისხლის სამართლის კოდექსის 19-108-ე მუხლით მიმდინარეობს, რაც განზრახ მკვლელობის მცდელობას გულისხმობს“, – აცხადებენ შსს-ში.
ბრალდებულს 10-დან 15 წლამდე ვადით თავისუფლების აღკვეთა ემუქრება.
რაც შეეხება დაჭრილს, მას სასწრაფო ოპერაცია ჩაუტარდა და ექიმის განცხადებით, მძიმე, მაგრამ სტაბილურ მდგომარეობაშია.