ტრაგიკულად დაღუპული მომღერალი და იუმორისტი მამუკა ონაშვილი ოჯახის გადაწყვეტილებით, მახათას მწერალთა და საზოგადო მოღვაწეთა პანთეონში დაკრძალეს.
“ბედნიერია ჩვენი ერი, რომ მრავალი ღირსეული შვილი ჰყავს, მაგრამ გულს გვტკენს ის, რომ დიდმა ნაწილმა უკვე დატოვა წუთისოფელი, მარადისობას შეერთო და მათი წასვლით ამქვეყნიური ყოფა კიდევ უფრო დამძიმდა.
მამუკა ონაშვილი თავისი გამორჩეული სიკეთით, სიყვარულით, ერთგულებით, პატიოსნებით, ნიჭიერებით, თავმდაბლობით, სარწმუნოებით… მართლაც რომ, შეუდარებლად დიდი იყო.
ვლოცულობთ მისი უკვდავი სულისათვის, რათა უფალმან სავანე თვისი დაუმკვიდროს, ხოლო მამუკას ყველა გულშემატკივარს მისთვის ლოცვის ძალა და მის მსგავსად სიკეთის მსახურება შეაძლებინოს,” – ნათქვამია პატრიარქის სამძიმრის წერილში.
მახათას პანთეონში ასევე დაკრძალული არიან მსახიობი და რეჟისორი გოგი ქავთარაძე, ლოტბარი ჯემალ ჭკუასელი და მსახიობი მარინა ჯანაშია.
სასაფლაო ივერიის ღვთისმშობლის ხატის ტაძრის გვერდით მდებარეობს. ტაძარი 2019 წელს სრულიად საქართველოს კათოლიკოს პატრიარქმა, უწმინდესმა და უნეტარესმა ილია მეორემ აკურთხა.
მამუკა ონაშვილი 30 ივლისს ნატახტართან მომხდარ ავარიას ემსხვერპლა.