“მხოლოდ უარყოფით მაჩვენებლებში უსწრებს საქართველოს მოლდოვა და უკრაინა” – ირაკლი კობახიძე მარტა კოს პასუხობს

ივანიშვილის წარმომადგენლის, ირაკლი კობახიძის განცხადებით, უკრაინა და მოლდოვა საქართველოს მხოლოდ უარყოფით მაჩვენებლებში უსწრებენ. ამის შესახებ კობახიძემ გაფართოების საკითხებში ევროკომისარ მარტა კოსის განცხადებზე, რომ უკრაინა-მოლდოვისგან განსხვავებით, საქართველო EU-ში გაწევრიანებაზე საგზაო რუკას ვერ მიიღებს, რადგან “საქართველო კანდიდატი ქვეყანა მხოლოდ ქაღალდზეა” დასმული შეკითხვის პასუხად განაცხადა.

“თუკი რაიმეში უსწრებს საქართველოს მოლდოვა და უკრაინა, მხოლოდ უარყოფით მაჩვენებლებში. ღმერთმა დაგვიფაროს, ამ ყველაფერში გადავასწროთ უკრაინას და მოლდოვას. ჩვენ გვაქვს ჩვენი გზა, ჩვენი გზა არის მშვიდობის გზა, ეკონომიკური განვითარების გზა და ამ გზას გავაგრძელებთ აუცილებლად”. – თქვა კობახიძემ.

გაფართოების საკითხებში ევროკომისარ მარტა კოსის განცხადებით, ევროკომისიამ გაწევრიანების პროცესში ოთხი მოწინავე კანდიდატი – მონტენეგრო, ალბანეთი, მოლდოვა და უკრაინა – გამოყო და მათთვის ინდივიდუალური საგზაო რუკების მომზადებას გეგმავს, საქართველო კი ამ ქვეყნებს შორის არ ფიგურირებს.

“საქართველო კანდიდატი ქვეყანა მხოლოდ ქაღალდზეა. ამას ვწუხვარ. ვისურვებდი, რომ ქართველი ხალხის უდიდესი მხარდაჭერის ფონზე, საქართველოც მოლდოვისა და უკრაინის დონეზე ყოფილიყო.” – თქვა კოსმა ტაბულას შეკითხვის პასუხად.