დმანისისა და აგარაკ-ტაშირის მთავარეპისკოპოსი ზენონი მოსკოვის საპატრიარქოს დელეგაციის ვიზიტს სოციალურ ქსელში ეხმაურება.
როგორც სასულიერო პირი განმარტავს, დროებით ოკუპირებულ აფხაზეთსა და ცხინვალში საქართველოს ეკლესიის იურისდიქციის აღიარება რუსეთისა და საქართველოს ეკლესიებს შორის წლების განმავლობაში იყო დიალოგიც, შეხვედრებიც და პრობლემის მოგვარების სურვილის საჯარო გამოხატვაც, მაგრამ კვლავ საქართველოს ეკლესიის მიღმა იმყოფება აფხაზეთიც და ცხინვალიც.
მაღალი იერარქის თქმით, ახლა რუსეთის ეკლესიისთვის მნიშვნელოვანია, რომ საქართველოს ეკლესიამ უკრაინის ახალი ეკლესია არ აღიაროს და აფხაზეთისა და ცხინვალის საკითხი ამ მხრივ ხელსაყრელ ბერკეტს წარმოადგენს.
ამდენად, მეუფე ზენონი ფიქრობს, რომ რუსეთის ეკლესიისთვის საქართველოს ეკლესიის იურისდიქციის აღიარება არა იმდენად კანონიკური წესრიგის ერთგულების გამოხატულებაა, რამდენადაც საკუთარი ინტერესების დაცვისა და საქართველოზე ზემოქმედების საშუალება.
“მოსკოვის საპატრიარქოს სიტყვა და საქმე
/აღიარება, რომელიც ინსტრუმენტად იქცა/
აფხაზეთისა და ცხინვალის რეგიონის
საეკლესიო საკითხზე საუბრისას, თავიდანვე ორი რამ უნდა გაიმიჯნოს: რას აცხადებდა და აცხადებს მოსკოვის საპატრიარქო ოფიციალურად და რა ვითარება შეიქმნა ამ ტერიტორიებზე სინამდვილეში. თუ მოვლენებს პატრიარქ ალექსი II-ის დროიდან დღემდე გავადევნებთ თვალს, ნათლად დავინახავთ, რომ მოსკოვისთვის საქართველოს ეკლესიის კანონიკური იურისდიქციის აღიარება არა პრინციპი, არამედ ინსტრუმენტია. ის შენარჩუნებულია იმდენად, რამდენადაც მოსკოვის ინტერესებს ემსახურება და ნებისმიერ დროს შეიძლება ზეწოლის საშუალებად იქცეს.