თბილისის 166-ე სკოლასთან მოსწავლეები და მშობლები აქციას მართავენ. მათი თქმით, მესამე წელია, რაც ბავშვებს სხვა სკოლებში უწევთ სწავლა.
მშობლები ამბობენ, რომ სამხარაულის ეროვნული ბიუროს დასკვნის საფუძველზე, სკოლა რეაბილიტაციას ექვემდებარება, თუმცა სამუშაოები ამ დრომდე არ დაწყებულა.
ისინი მოითხოვენ, სკოლას რეაბილიტაცია ჩაუტარდეს, ან გამოიძებნოს ალტერნატიული სივრცე, სადაც 166-ე საჯარო სკოლის მოსწავლეები, ერთ სივრცეში შეძლებენ სასწავლო პროცესის გაგრძელებას.
ბავშვებს ხელში უჭირავთ ბანერები წარწერით: „ნუ გვყოფთ სხვადასხვა შენობაში, დაგვიბრუნეთ ჩვენი სკოლა!“ „დამიბრუნეთ ჩემი სკოლა და საკლასო ოთახი!“ „ნუ დაგვინგრევთ სკოლას!“
„როგორც ჩვენ ვიცით, პირველადი ექსპერტიზის დასკვნით, ჩვენ სკოლას აქვს მინიჭებული მეორე-მესამე დონის კატეგორია, რაც იმას გულისხმობს, რომ შესაძლებელი იყო აღდგენა და არა დემონტაჟი. ამ დასკვნის საფუძველზე ვითხოვთ, სკოლას დაუყოვნებლივ ჩაუტარდეს [რეაბილიტაცია] და დაბრუნდეს სასწავლო პროცესი ამ სკოლაში“, – განაცხადა ერთ-ერთმა მშობელმა.