როგორ დააკავეს ფაშისტური დაჯგუფების ლიდერი, დავით ჯაფაროვი? – “ტვ პირველი” ახალ ინფორმაციას ავრცელებს.
კაცს, რომელსაც არასრულწლოვნის მიმართ არაადამიანური მოპყრობის ორგანიზებისთვის ბრალი უკვე წარუდგინეს, პოლიცია საცხოვრებელ სახლთან რამდენიმე დღის განმავლობაში უთვალთვალებდა – ამ ინფორმაციას “ტვ პირველს” ჯაფაროვის მეზობლები უდასტურებენ.
გარდა ამისა, მეზობლები ამბობენ, რომ კრიმინალური პოლიციის თანამშრომლებმა დეტალურად დაათვალიერეს ირგვლივ მდებარე კამერების ჩანაწერებიც.
დავით ჯაფაროვს ხელბორკილები ვაშლიჯვარში დააკავეს. მისი ჩხრეკის შედეგად სამართალდამცველებმა ცივი იარაღი ამოიღეს.
გამოძიების თანახმად, 2023 წელს, „ნაცისტურ-ფაშისტური“ იდეოლოგიის მქონე დაჯგუფების ერთ-ერთმა ლიდერმა თანამოაზრეებთან ერთად, არსებული უთანხმოების ნიადაგზე, მისი ნაცნობი მოტყუებით წაიყვანა თბილისში მდებარე ერთ-ერთ მიტოვებულ ტერიტორიაზე, სადაც სხვადასხვა ბლაგვი საგნის გამოყენებით ჯგუფურად ფიზიკურად იძალადეს, ასევე, არაადამიანური და დამამცირებელი მოპყრობა განახორციელეს არასრულწლოვნის მიმართ.
სამართალდამცველებმა განზრახი დანაშაულისთვის ნასამართლევი, „ფაშისტური-ნაცისტური“ იდეოლოგიის მქონე დაჯგუფების ლიდერი 24 სექტემბერს დააკავეს, მას ბრალდება საქართველოს სისხლის სამართლის კოდექსის 144-ე ტერცია მუხლის მე-2 ნაწილის „ე“, „ზ“ ქვეპუნქტებით (არაადამიანური მოპყრობა, წინასწარი შეცნობით არასრულწლოვნის მიმართ და ჯგუფურად), 25,144-ე ტერცია მუხლის მე-2 ნაწილის „ე“ და „ზ“ ქვეპუნქტებით (წინასწარი შეცნობით არასრულწლოვნის მიმართ ჯგუფურად, არაადამიანური მოპყრობის ორგანიზება) და 238 პრიმა მუხლის მე-2 ნაწილით (განზრახი დანაშაულისათვის ნასამართლევი პირის მიერ ცივი იარაღის ტარება) წარედგინა, რაც სასჯელის სახედ და ზომად 10 წლამდე თავისუფლების აღკვეთას ითვალისწინებს.
პროკურატურა ბრალდებულისთვის აღკვეთის ღონისძიების სახით პატიმრობის შეფარდების შუამდგომლობით სასამართლოს დღეს მიმართავს.