უახლოეს დღეებში საქართველოში არამდგრადი ამინდია მოსალოდნელი – ამის შესახებ სინოპტიკოსმა დოდო გვაზავამ “მეტრონომთან” საუბრისას განაცხადა. როგორც მან აღნიშნა, განსაკუთრებით ნალექიანი იქნება 18, 19 და 20 სექტემბერი აღმოსავლეთ საქართველოში.
მისივე თქმით, ცალკეულ ადგილებში შესაძლებელია ძლიერი ნალექიც. ამასთან, აღმოსავლეთ საქართველოში ტემპერატურის დაკლებაა მოსალოდნელი.
“ამ კვირის ბოლომდე მთლიანად საქართველოში არამდგრადი ამინდია მოსალოდნელი, განსაკუთრებით ნალექიანი იქნება 18, 19 და 20 სექტემბერი აღმოსავლეთ საქართველოში. ზოგან შესაძლებელია ნალექი ძლიერი იყოს. ასევე, აღმოსავლეთ საქართველოში ტემპერატურის დაკლებაც არის მოსალოდნელი.
ამ ეტაპზე მაქსიმალური ტემპერატურა 30 გრადუსამდეა, კახეთში კი 32 გრადუსამდე. 18 სექტემბრიდან ტემპერატურა დაახლოებით 4-5 გრადუსით დაიკლებს და შესაძლებელია 25-26 გრადუსამდე ჩამოვიდეს. კვირასაც შენარჩუნდება არამდგრადი ამინდი, თუმცა ტემპერატურის მნიშვნელოვანი დაკლება აღარ არის მოსალოდნელი.
როგორც ასეთი, შემოდგომა უკვე დაწყებულია, სექტემბერი ძალაში გვაქვს და ამ პერიოდში ნალექიანი დღეები ჩვეულებრივი მოვლენაა. 18-19 სექტემბერს მნიშვნელოვანი წვიმებია მოსალოდნელი და ტემპერატურაც რამდენიმე გრადუსით დაბალი იქნება.
მომდევნო კვირიდან, ორშაბათიდან, მნიშვნელოვანი ტემპერატურის დაკლება აღარ არის მოსალოდნელი. 23, 24 და 25 სექტემბერს, პირიქით, ტემპერატურა კვლავ 30 გრადუსამდე მოიმატებს. თვის ბოლომდე კი აღმოსავლეთ საქართველოში მნიშვნელოვანი ცვლილებები მოსალოდნელი არ არის.
რაც შეეხება კახეთის რეგიონს, ეს კვირა წვიმით დასრულდება. მოსალოდნელია ტემპერატურის კლება – 30 გრადუსიდან დაახლოებით 27-25 გრადუსამდე. მკვეთრ აციებასა და ტემპერატურის მნიშვნელოვან ვარდნაზე საუბარი არ არის, თუმცა წვიმიანი ამინდი და შედარებით დაბალი ტემპერატურა გარკვეულწილად არასასიამოვნო შეგრძნებას ტოვებს, განსაკუთრებით ახლა, შემოდგომაზე, მით უმეტეს მაშინ, როდესაც რთველის მოლოდინში ვართ.
ორშაბათიდან კახეთის რეგიონშიც, უმეტესად, უნალექო ამინდებია მოსალოდნელი. ეს პროგნოზი თვის ბოლომდე, 30 სექტემბრის ჩათვლით, შეგვიძლია განვიხილოთ” – განაცხადა დოდო გვაზავამ “მეტრონომთან”.