ფიზიკური პირებისთვის ქონების გადასახადის შეღავათის გაფართოების შედეგად, დაახლოებით 81 000 გადამხდელს ბიუჯეტში ჯამურად 22 მლნ ლარის გადახდა აღარ მოუწევს.
როგორც ფინანსთა მინისტრის მოადგილემ, შემოსავლების სამსახურის უფროსმა მამუკა ბარათაშვილმა განაცხადა, კანონპროექტის დაჩქარებული წესით მიღება იგეგმება, რის შედეგადაც მოქალაქეები ახალი შეღავათით უკვე მიმდინარე წელს შეძლებენ სარგებლობას.
„ფინანსთა სამინისტროსა და პარლამენტის ერთობლივი მუშაობის შედეგად ქონების გადასახადში მნიშვნელოვანი ცვლილებები იგეგმება. კერძოდ, მომზადებულია კანონპროექტი, რომელიც ითვალისწინებს 40 000-ლარიანი შემოსავლის ზღვრის 100 000 ლარამდე გაზრდას. ეს ნიშნავს, რომ 40 000-დან 100 000 ლარამდე შემოსავლის მქონე ოჯახები სრულად გათავისუფლდებიან ქონების გადასახადისგან. დღეის მდგომარეობით, ეს 81 000 გადამხდელს შეეხება, რომელთა ბიუჯეტში გადასახდელი თანხა დაახლოებით 22 მლნ ლარს შეადგენდა. ცვლილების განხორციელების შემთხვევაში, მათ ამ თანხის გადახდა აღარ მოუწევთ.
მნიშვნელოვანია, რომ ცვლილებები დაჩქარებული წესით იქნეს ინიცირებული, რაც ნიშნავს იმას, რომ უკვე წელს მოახერხებენ ფიზიკური პირები ამ შეღავათით სარგებლობას.
ფიზიკურ პირთა ქონების დეკლარირების ვადა 1-ელ ნოემბერს იწურება, ხოლო გადახდის ვადა სავარაუდო თარიღი 15 ნოემბერია“, – განაცხადა მამუკა ბარათაშვილმა.
ცნობისთვის, ამ დროისთვის ქონების გადასახადი უწევს პირს, თუ მისი ან ოჯახის შემოსავალი წლიურად 40 000 ლარს აღემატება.
ის, რომ ფიზიკური პირებისთვის ქონების გადასახადის ზღვარი 100 ათას ლარამდე იზრდება, საპარლამენტო უმრავლესობის გუშინდელი სხდომის დასრულების შემდეგ გახდა ცნობილი.