რა ეღირება ახალი iPhone – Apple დღეს რამდენიმე ახალი პროდუქტის პრეზენტაციას გეგმავს
დღეს, 9 სექტემბერს, Apple-ის წლის ყველაზე მასშტაბური ღონისძიებაა დაგეგმილი, სადაც ტექნოლოგიური გიგანტი ოფიციალურად წარადგენს ახალ iPhone 18-ს, iPhone 18 Pro-ს და სრულიად ახალ iPhone Ultra-ს.
პრეზენტაციაზე ცნობილი გახდება ახალი მოწყობილობების ოფიციალური ღირებულება. თუმცა, იქამდე მათი სავარაუდო ღირებულებების შესახებ გავრცელდა ცნობები.
მათ შორის, ავტორიტეტული გამოცემა Forbes-ის ინფორმაციით, ტაივანური კვლევითი კომპანია TrendForce (რომელიც Apple-ის მომარაგების ჯაჭვის მონაცემების მაღალი სიზუსტით გამოირჩევა) პროგნოზირებს, რომ ახალი სმარტფონების ფასი ადრეულ ვარაუდებთან შედარებით საგრძნობლად მაღალი იქნება.
რა ეღირება ახალი iPhone 18 და iPhone Ultra?
TrendForce-ის ანალიტიკოსების მიხედვით:
iPhone Ultra: სრულიად ახალი, ტოპ-სეგმენტის მოდელის საწყისი ფასი 2 099 აშშ დოლარიდან 2 299 აშშ დოლარამდე იქნება.
iPhone 18 Pro: მოსალოდნელია, რომ პრეზენტაციისას პრო-ვერსიები გასული წლის iPhone 17 Pro-ზე 100–200 აშშ დოლარით ძვირი ეღირება.
პუბლიკაციაში ნათქვამია, რომ ფასების მკვეთრი მატების მთავარი მიზეზი გლობალურ ბაზარზე მეხსიერების ჩიპების დეფიციტი და გაძვირებაა, რამაც 2026 წელს უკვე იმოქმედა Mac-ის, iPad-ისა და Android სმარტფონების ფასებზე.
კვლევითი კომპანია IDC-ის ცნობით, „იაფი სმარტფონების ეპოქა სრულდება“ და ფლაგმანების საბაზისო ფასი გლობალურად იზრდება.
ქართველი მომხმარებლისთვის ასევე მნიშვნელოვანია აღინიშნოს, რომ საბაზო (სტანდარტული) iPhone 18-ის გამოსვლა მხოლოდ 2027 წლის გაზაფხულზე იგეგმება, რაც ნიშნავს, რომ მიმდინარე წელს ახალი აიფონის შეძენის მსურველებს მხოლოდ მაღალფასიანი Pro და Ultra მოდელები დახვდებათ.
ტრადიციისამებრ, iPhone 18-ის პრეზენტაციისთანავე Apple ოფიციალურად შეწყვეტს iPhone 17 Pro და Pro Max მოდელების წარმოებას.