დამსვენებლებმა და ადგილობრივებმა შავ ზღვაში გიგანტური ქარბორბალა დააფიქსირეს. ვიდეოები სოციალურ ქსელში შეკვეთილიდან, ურეკიდან და ქობულეთიდან გაავრცელეს – აღნიშნულ საკითხთან დაკავშირებით, “მეტრონომი” “საქართველოს მწვანეები – დედამიწის მეგობრების” თავმჯდომარეს, ნინო ჩხობაძეს ესაუბრა.
როგორც მან ჩვენთან საუბრისას განაცხადა, ეს ბუნებრივი, ჩვეულებრივი მოვლენაა, რომელიც ადრეც ხდებოდა საქართველოში:
“ბუნებრივი, ჩვეულებრივი მოვლენაა, რომელიც ადრეც ხდებოდა საქართველოში (მაგალითად, კახეთში, სადაც ალავერდის სახურავი დააზიანა). ახლანდელი ქარბორბალა კი ქობულეთში, ზღვაში მოხდა და ნაპირთან ახლოს არ ყოფილა.
განმეორების ალბათობას რაც შეეხება მოვლენა ბუნებრივია და მისი კვლავ განმეორება სავსებით შესაძლებელია.
მასშტაბებზე წინასწარ ვერავინ იტყვის, გაიზარდება თუ არა მასშტაბი, თუმცა ფაქტია, რომ საქართველოში ქარბორბალები ისედაც არსებობდა და ხდება ხოლმე.
წინასწარი პროგნოზირება გამორიცხულია, არ კეთდება და შესაბამისად, მოსახლეობის წინასწარი გაფრთხილებაც შეუძლებელია” – განაცხადა ნინო ჩხობაძემ.