საპარლამენტო უმრავლესობის წევრის თენგიზ შარმანაშვილის განცხადებით, ადამიანებს, რომლებიც დღეს პატიმრობაში იმყოფებიან, უკანონობისკენ ვინც უბიძგა, ისინი ეუბნებიან, რომ ციხეში უნდა დარჩნენ, რადგან სჭირდებათ იმიჯი, თითქოს ციხეები პოლიტპატიმრებითაა სავსე.
„მძიმე სანახავია, რაც პატიმრებთან დაკავშირებით ხდება. ამ ადამიანებს ჯერ სემინარებს უტარებდნენ და ეუბნებოდნენ, თურმე ტერორიზმი თავისუფლებასთან ბრძოლაში გამოსაყენებელი მეთოდოლოგია ყოფილა. ევროკავშირის თანხები იხარჯებოდა, რომ ახალგაზრდების თავში სისულეები გამოეტენათ, როცა საერთაშორისო სამართალი მომართულია იქითკენ, რომ ტერორიზმის გამართლება არცერთი მოტივით არ შეიძლება.
ამ ადამიანებს უთხრეს, რომ დემოკრატიისთვის ბრძოლაა – „მოლოტოვის კოქტეილის“ სროლა, პარლამენტში ცეცხლის გაჩენა. ეს ხალხი ამის გამო როცა დააპატიმრეს, მიატოვეს. ზოგს სინდისის და ზოგს პოლიტპატიმარი დაარქვეს, მაგრამ ისინი მიაგდეს. ეს ადამიანები როცა მიხვდნენ, რომ არასწორო ნაბიჯები გადადგეს და მათ სახელმწიფომაც უთხრა, სამართლისკენ თუ შემობრუნდებით, ნაბიჯს ჩვენც გადმოვდგამთო, იმის გამო, რომ მათ სჭირდებათ იმიჯი, თითქოს ციხეები პოლიტპატიმრებითაა სავსე, ამ ადამიანებს ეუბნებიან, ეს ნაბიჯი რატომ გადადგეს, ციხეში ყოფილიყვნენ. მერე რა, რომ უკანონობისკენ მათ ბუბიძგეს, ეს უნდა აეტანათ. ყველა ადამიანს შეუძლია, გარისკოს, მაგრამ სასწორზე უნდა შეგადოს არა სხვისი, არამედ საკუთარი სიცოცხლე. ვისაც ასე მიაჩნია, ეს თავად გააკეთოს, სხვებს თავი დაანებონ“, – განაცხადა თენგიზ შარმანაშვილმა.