2026 წლის 27-28 აგვისტოს მსოფლიოს სხვადასხვა რეგიონში მცხოვრებ ადამიანებს ნაწილობრივი მთვარის დაბნელების ნახვის შესაძლებლობა ექნებათ. ამ დროს დედამიწის ჩრდილი მთვარის ზედაპირის დაახლოებით 96%-ს დაფარავს, რის გამოც მისი დიდი ნაწილი შესაძლოა მოწითალო-ნარინჯისფრად შეფერადდეს.
დაბნელება სავსე მთვარის დროს ხდება, როდესაც დედამიწა მზესა და მთვარეს შორის ექცევა. ამ შემთხვევაში მთვარე სრულად არ დაიჩრდილება – მისი მცირე ნაწილი მზის პირდაპირი სხივებით განათებული დარჩება, ხოლო დანარჩენი დედამიწის ჩრდილში მოექცევა.
მოწითალო ფერი დედამიწის ატმოსფეროს უკავშირდება: მზის სხივები ატმოსფეროში გავლისას მიმართულებას იცვლის და მათი ნაწილი მთვარის ზედაპირს აღწევს. სწორედ ამიტომ მთვარის დაბნელებას ხშირად „სისხლიან მთვარეს“ უწოდებენ.
ფენომენის ხილვა შესაძლებელი იქნება, მათ შორის, ევროპის, აფრიკისა და ჩრდილოეთ და სამხრეთ ამერიკის სხვადასხვა ნაწილიდან. თუმცა ზუსტი ხილვადობა კონკრეტულ მდებარეობაზე იქნება დამოკიდებული – ზოგიერთ ადგილას დაბნელების პიკზე მთვარე ჰორიზონტთან ახლოს იქნება.
მთვარის დაბნელებაზე დაკვირვება შეუიარაღებელი თვალით სრულიად უსაფრთხოა და სპეციალური დამცავი სათვალე საჭირო არ არის. სანახაობა კი ბინოკლით ან ტელესკოპით კიდევ უფრო შთამბეჭდავი იქნება.