“ყველა მოქალაქეს დავეხმარებით, გვერდით დავუდგებით, გქონდეთ ჩვენი იმედი…” – რას ამბობს კახა კალაძე

“ეს ქალაქი ყველასია, ყველა ჩვენი შესაძლებლობების ფარგლებში გვერდით უნდა დავუდგეთ დედაქალაქს, ერთმანეთს. ერთად უნდა შევქმნათ უკეთესი თბილისი, სადაც რაც შეიძლება ნაკლები პრობლემა არსებობდეს. 24 საათი ხაზზე ვართ, თქვენს სამსახურში, ღია ვართ კომუნიკაციისთვის. არცერთ პრობლემას არ დავტოვებთ უყურადღებოდ” – აცხადებს კახა კალაძე.
მისი თქმით, რამდენიმე დღის წინ მოსული ძლიერი წვიმით გამოწვეული ზარალის აღწერა მიმდინარეობს:
“ყველა მოქალაქეს დავეხმარებით, გვერდით დავუდგებით, გქონდეთ ჩვენი იმედი. არავის დაგტოვებთ პრობლემების პირისპირ, ყველას დაგეხმარებით შესაძლებლობის ფარგლებში. როდესაც დროის მოკლე მონაკვეთში ამ რაოდენობის ნალექი მოდის, დიდ პრობლემას წარმოადგენს არამხოლოდ ჩვენთან, ჩვენზე უფრო ძლიერ და განვითარებულ ქვეყნებში, ქალაქებში. როდესაც სიძლიერეზე ვსაუბრობ, ეკონომიკურად ძლიერ ქალაქებზე, რა თქმა უნდა, იქ ინფრასტრუქტურა, მიწისქვეშა კომუნიკაცია უფრო გამართულია, ვიდრე ჩვენთან, იქაც კი პრობლემებია ასეთ დროს“ – თქვა კალაძემ.