არსენალის მთასთან მისასვლელი გზების პროექტირება იწყება – მთავრობამ შესაბამისი განკარგულება გამოსცა
თბილისში, არსენალის მთასთან მისასვლელი საავტომობილო გზების ალტერნატიული მიმართულებების ანალიზსა და დეტალური საპროექტო დოკუმენტაციის მომზადებას ინფრასტრუქტურის სამინისტროს საავტომობილო გზების
დეპარტამენტი უზრუნველყოფს. მთავრობის შესაბამისი განკარგულება, რომელსაც ხელს ირაკლი კობახიძე აწერს, უკვე გამოიცა.
დოკუმენტის თანახმად, დეპარტამენტი აღნიშნულ მომსახურებას შესაბამის წელს მისთვის გამოყოფილი ასიგნებების ფარგლებში განახორციელებს. ამასთან, საჭიროების შემთხვევაში, ინფრასტრუქტურის სამინისტრომ 2026–2028 წლებში დაფინანსების უზრუნველსაყოფად შესაბამისი სახსრების მოძიება უნდა უზრუნველყოს.
რა დაევალა თბილისის მერიას?
განკარგულებით, თბილისის მუნიციპალიტეტის მერიას ეთხოვა:
არსენალის მთაზე დაგეგმილი სამშენებლო სამუშაოების გათვალისწინებით, უზრუნველყოს საპროექტო ტერიტორიასა და დედაქალაქის ცენტრალურ ნაწილს შორის არსებული სატრანსპორტო კავშირების კვლევა.
განახორციელოს შესაბამისი საავტომობილო გზების სამშენებლო და სარეაბილიტაციო სამუშაოების პროექტირება-მშენებლობა (გარდა იმ ნაწილისა, რასაც გზების დეპარტამენტი მოამზადებს).
დოკუმენტის მიხედვით, დედაქალაქის მერიამ აღნიშნული სამუშაოების განხორციელება 2026–2029 წლების განმავლობაში უნდა უზრუნველყოს.
როგორც ცნობილია, არსენალის მთაზე მთავრობა„სამთავრობო ქალაქის“ მშენებლობას გეგმავს. „სამთავრობო ქალაქის“ მშენებლობის ფარგლებში დაგეგმილი ინფრასტრუქტურული პროექტების შეუფერხებლად განხორციელების მიზნით, სპეციალური უწყებათაშორისი კომისია შეიქმნა. შესაბამის დადგენილებას ხელი საქართველოს პრემიერ-მინისტრმა, ირაკლი კობახიძემ მოაწერა.