არ არსებობს არცერთი პირდაპირი და ირიბი მტკიცებულება, რომელიც ჩემი დაცვის ქვეშ მყოფის მიმართ წარდგენილ ბრალს გონივრული ეჭვს მიღმა სტანდარტით დაამტკიცებს და დაადასტურებს , – ამის შესახებ მოკლული მასწავლებლის, გიგა ავალიანის საქმეზე, ჯგუფურად ჯანმრთელობის განზრახ მძიმე დაზიანებაში დახმარების ფაქტზე ბრალდებული, შინაგან საქმეთა ყოფილი მინისტრის მოადგილის შვილის, გიორგი მალანიას ადვოკატმა, ლაშა ცუცქირიძემ სასამართლო სხდომის დასრულების შემდეგ განაცხადა.
ცუცქირიძის თქმით, თუ სასამართლო ობიექტურად და სამართლიანად განიხილავს საქმეს, მალანიას მიმართ აუცილებლად დადგება გამამართლებელი განაჩენი.
“დღეს გაიხსნა საქმის არსებითი განხილვის ეტაპი. მხარეებმა წარვადგინეთ ჩვენი შესავალი სიტყვები – ბუნებრივია, იმ მასალებსა და ფაქტებზე დაყრდნობით, რომ არ არსებობს არცერთი პირდაპირი და ირიბი მტკიცებულება, რომელიც ჩემი დაცვის ქვეშ მყოფის მიმართ წარდგენილ ბრალს გონივრული ეჭვს მიღმა სტანდარტით დაამტკიცებს და დაადასტურებს. მიგვაჩნია, რომ საქმის არსებითი განხილვის დასასრულს მოსამართლემ უნდა გამოიტანოს ერთადერთი სამართლიანი და ობიექტური გადაწყვეტილება ჩვენი ხედვით. რა თქმა უნდა, ეს იქნება სრულად გამამართლებელი განაჩენი და თუ სასამართლო ობიექტურად, სამართლიანად განიხილავს აღნიშნული სისხლის სამართლის საქმეს, გ.მ.-ის მიმართ აუცილებლად დადგება გამამართლებელი განაჩენი”, – განაცხადა ადვოკატმა.