თემქაზე მოკლული მასწავლებლის გიგა ავალიანის საქმეზე დაკავებული ანასტასია ბერუაშვილი დიღმის იზოლატორშია გადაყვანილი.
როგორც დაკავებულის ადვოკატმა ქეთევან ვარდანაშვილმა ჟურნალისტებს განუცხადა, მისი დაცვის ქვეშ მყოფს გიგა ავალიანის მკვლელობასთან არავითარი კავშირი არ აქვს.
ვარდანაშვილი არ გამორიცხავს, რომ ბერუაშვილის კლინიკაში გადაყვანა გახდეს საჭირო, რადგან მისი თქმით, დაკავებული წინასწარი დაკავების იზოლატორში შეუიძლოდ მინიმუმ ორჯერ გახდა.
მინდა გითხრათ, რომ მდგომარეობა არ არის კარგი. მას წუხელ დასჭირდა სამედიცინო კუთხით დახმარება. ამჟამადაც დასჭირდა, რადგან ჩემთან საუბრიოს დროს, აღნიშნა, რომ სუსტად გრძნობდა თავს, შესაბამისად დაიწერა განცხადება და მოთხოვნა სამედიცინო დახმარებასთან დაკავშირებით. არ არის გამორიცხული [კლინიკაში გადაიყვანონ].
ბრალის წარდგენა ალბათ, მოხდება რამდენიმე საათში”- აცხადებს ადვოკატი.
ქეთევან ვარდანაშვილის განცხადებით, ანასტასია ბერუაშვილი რაიმე სახის დანაშაულს არ შესწრებია, შესაბამისად მუხლი, რომლითაც ის დააკავეს “აბსურდულია”.
სატელეფონო საუბრები რამდენჯერ მიმდინარეობდა, რა პერიოდში, რა დროის მონაკვეთში, ამას მე ვერ დაგიდასტურებთ. მაგრამ თუ ასეთიც მიმდინარეობდა, ყოველ შემთხვევაში, ამ საქმესთან დაკავშირებით გამოვრიცხავ. მომხდარის შესახებ მისთვის ცნობილი გახდა, საჯაროდ გავრცელებული ინფორმაციის საფუძველზე. ანუ მომხდარიდან რამდენიმე დღის შემდეგ.
შეყვარებული რომც ყოფილიყო და თუ იყო, ეს არ ნიშნავს, რომ ის ინფორმაციას ფლობდა”- განაცხადა იურისტმა.
ქეთევან ვარდანაშვილს განცხადებით, გიგა ავალიანის დედის, ეკა კუპატაძის მხრიდან არაერთი ცრუ ინფორმაცია ვრცელდება, მათ შორის ანასტასია ბერუაშვილის მიმართ.
ქალბატონი ეკატერინე სისტემატიურად აკეთებდა ამა თუ იმ განცხადებებს, შემიძლია გითხრათ, რომ ცილისმწამებლურ განცხადებებსაც აკეთებდა ჩემი დაცვის ქვეშ მყოფის მიმართ”- დასძინა მან.
ქეთევან ვარდანაშვილი ამბობს იმასაც, რომ ანასტასია ბერუაშვილსა და ნია იმნაძეს მხოლოდ ერთხელ ჰყავთ ერთმანეთი ნანახი.
„ანასტასია ბერუაშვილსა და ნია იმნაძეს ერთმანეთი ერთადერთხელ ჰყავთ ნანახი რამდენიმე წუთით. ამდენად მათ არანაირი მეგობრული ურთიერთობა არ ჰქონიათ, არანაირი კონტაქტი არ ჰქონიათ“, – განაცხადა ქეთევან ვარდანაშვილმა.
ცნობისთვის, გიგა ავალიანის საქმეზე კიდევ ერთ ფიგურანტი, ანასტასია ბერუაშვილი გუშინ დააკავეს. ის აღნიშნულ საქმეზე მსჯავრდადებულ გიორგი რიკაძის შეყვარებულია. დაკავებულს სისხლის სამართლის 376-ე მუხლის მეორე ნაწილით გათვალისწინებულ დანაშაულს ედაცებიან, რაც განსაკუთრებით მძიმე დანაშაულის შეუტყობინებლობას გულისხმობს.
რაც შეეხება ნია იმნაძეს, ის გუშინ, სისხლის სამართლის კოდექსის 25/117 მუხლი მესამე “ლ” ქვეპუნქტით გათვალისწინებული დანაშაულის ბრალდებით დააკავეს, რაც ჯანმრთელობის განზრახ მძიმე ჯგუფური დაზიანების წაქეზებას გულისხმობს.