თბილისის საქალაქო სასამართლოში, დღეს, ჯაშუშობის ბრალდებით დაკავებული გიორგი უძილაურის პროცესი გაიმართა. დღევანდელ სასამართლო სხდომაზე მხარეებმა შესავალი სიტყვები წარმოთქვეს. ასევე, ბრალდების მხარემ დააფიქსირა, რომ მტკიცებულებები აქვს, ხოლო დაცვის მხარემ დააფიქსირა, რომ მტკიცებულებები არ აქვს.
“ქართუ ჯგუფის” საზოგადოებასთან ურთიერთობის ყოფილი ხელმძღვანელის ადვოკატის, ბექა გულედანის განცხადებით, გიორგი უძილაური თავს კვლავ უდანაშაულოდ ცნობს.
უფლებადამცველი განმარტავს, რომ გიორგი უძილაურმა სასამართლოში განაცხადა: “პოზიციებს არ ვიცვლი იმის მიხედვით, თუ როგორ იცვლება ტრენდი პოლიტიკაში”.
“დღეს იყო არსებითი განხილვის პირველი სხდომა. მხარეებმა თქვეს შესავალი სიტყვები. ბრალდების მხარემ დააფიქსირა, რომ მტკიცებულებები გვაქვსო. დაცვის მხარემ დააფიქსირა, რომ არ გვაქვს მტკიცებულებები.
გიორგი, როგორც ადრე, თავს დამნაშავედ არ ცნობს. ასევე თქვა, რომ “მე რომ ჯაშუში ვყოფილიყავი, კონტრდაზვერვა კი არ დამაკავებდა, არამედ დამამუშავებდაო”, ასევე თქვა, მე პოზიციებს არ ვიცვლიო იმის მიხედვით, თუ როგორ იცვლება ტრენდი პოლიტიკაშიო.
არავინ არ იცის, ამ კონვერტში რა იდო, თანხა იქ არ დებულა. ეს გამოძიებამ დაადგინოს, რა თანხა იყო, თუ რა იყო. ასევე, საქმეში არანაირი დაშიფრული მასალები არ არის,” – განაცხადა ბექა გულედანმა.
შეგახსენებთ, რომ საქმეს გრიფი ადევს, შესაბამისად პროცესები დახურულია.
გიორგი უძილაურს ბრალდება საქართველოს სისხლის სამართლის კოდექსის 314-ე მუხლის პირველი ნაწილით (ჯაშუშობა) აქვს წარდგენილი.
ბრალის დამტკიცების შემთხვევაში, მაღალჩინოსანს 12 წლამდე პატიმრობა ემუქრება.