“დროას” ლიდერი, ელენე ხოშტარია, რომელიც რუსთავის ციხიდან კლინიკა “ვივამედში” გადაიყვანეს, მისმა ექიმებმა – მაკა იოსელიანმა და ანი ქავთარაძემ მოინახულეს.
როგორც ანი ქავთარაძემ მედიასთან განაცხადა, ასევე, მათ შეხვედრა ჰქონდათ “ვივამედის” კლინიკურ დირექტორთან, რომელთანაც ელენე ხოშტარიას ჯანმრთელობისა და დიაგნოზის შესახებ ჰქონდათ საუბარი.
ექიმის ინფორმაციით, მას გააცნეს საკუთარი მოსაზრებები და შეთანხმდნენ თანამშრომლობაზე პაციენტის საუკეთესო ინტერესებიდან გამომდინარე.
“გვქონდა ძალიან კოლეგიალური საუბარი, დავგეგმეთ უახლოესი დღეების მანძილზე ჩასატარებელი კვლევები”, – დასძინა ქავთარაძემ.
ექიმის ინფორმაციით, ამ ეტაპისთვის პაციენტს მხოლოდ საბაზისო, რუტინული ლაბორატორიული კვლევები ჩაუტარდა, რომლის პასუხებიც, სავარაუდოდ, ხვალ გახდება ცნობილი.
“ამის პარალელურად, გვექნება ონლაინ კონსილიუმი სხვადასხვა მიმართულების სპეციალისტებთან, რომლებთან ერთადაც დავგეგმავთ სხვა ინსტრუმენტულ კვლევებს და უფრო ვიწროდ, სხვადასხვა მიმართულებით ლაბორატორიულ კვლევებს”, – აცხადებს ანი ქავთარაძე.
რაც შეეხება ოპოზიციონერი პოლიტიკოსის ჯანმრთელობის ამჟამინდელი მდგომარეობას, ანი ქავთარაძის თქმით, ელენე ხოშტარიას ჯანმრთელობის მდგომარეობა არ შეცვლილა.
“შეიძლება ითქვას, რომ იგივეა, რაც გუშინწინ ვნახეთ ციხის პირობებში და ვიმედოვნებთ, რომ ურთიერთთანამშრომლობის პროცესში ჩვენს კოლეგებთან ერთად შევძლებთ, რომ ელენეს დაავადების პროგრესირება შევაჩეროთ და დაუბრუნდეს ის ჩვეულ მდგომარეობას”,- დასძინა ანი ქავთარაძემ.