უკრაინაში დაღუპულ ქართველ მებრძოლებს სამშობლოში 3 ივლისს ჩამოასვენებენ. კიევიდან თბილისის საერთაშორისო აეროპორტში ელოდებიან „ქართველი პარტიზანების“ მეთაურის, დავით ქუქჩიშვილის ცხედარს, რომელიც ხარკოვის მიმართულებით მიმდინარე საბრძოლო მოქმედებების დროს დაიღუპა.
არსებული ინფორმაციით, დავით ქუქჩიშვილთან ერთად საქართველოში ჩამოასვენებენ კიდევ ორ ქართველ მებრძოლს – გიორგი დამენიასა და იგორ ბეკურაშვილს, რომლებიც 25 ივნისს აღმოსავლეთის ფრონტზე დაიღუპნენ.
მანამდე კიევის მთავარანგელოზ მიქაელის სახელობის ოქროსგუმბათიან მონასტერში ქართველი მებრძოლების სამოქალაქო პანაშვიდი მიმდინარეობს, სადაც მათ პატივს ოჯახის წევრები, თანამებრძოლები და მოქალაქეები მიაგებენ.