საქართველოს ფინანსთა სამინისტროს საგამოძიებო სამსახურის თანამშრომლებმა, სამეგრელო-ზემო სვანეთის საოლქო პროკურატურასთან კოორდინაციით ჩატარებული ოპერატიულ-სამძებრო ღონისძიებებისა და საგამოძიებო მოქმედებების შედეგად, უკანონო სამეწარმეო საქმიანობისა და უკანონო შემოსავლის ლეგალიზაციის ფაქტებზე ორი პირი- ვ.გ და ლ.ს.დააკავეს. ინფორმაციას “ტვ პირველი” ავრცელებს.
გამოძიებით დადგინდა, რომ ბრალდებულები გურიის რეგიონში, მდინარე სუფსიდან, შესაბამისი ნებართვისა და ლიცენზიის გარეშე სისტემატიურად მოიპოვებდნენ ინერტულ მასალას, რომლის რეალიზაციასაც სხვადასხვა მეწარმე სუბიექტზე ახდენდნენ. ჯამში უკანონოდ მოპოვებულ იქნა 380 804 ლარის ღირებულების 32 957 კუბური მეტრი ინერტული მასალა, ხოლო გარემოსთვის მიყენებულმა ზიანმა 494 345 ლარი შეადგინა. ამასთანავე, ერთ-ერთმა ბრალდებულმა განახორციელა 45 713 ლარის ოდენობით უკანონო შემოსავლის ლეგალიზაცია.
საქმეზე გამოძიება მიმდინარეობს საქართველოს სისხლის სამართლის კოდექსის 192-ე მუხლის მეორე ნაწილის „ა“ ქვეპუნქტით და 194-ე მუხლის მეორე ნაწილის „გ“ ქვეპუნქტით, რაც სასჯელის სახით თავისუფლების აღკვეთას 6-დან 9 წლამდე ითვალისწინებს.
“პირველების” ინფორმაციით, დაკავებულები არიან ლევან სკამკოჩაიშვილი მეტსახელად “ბუზია” და ვაჟა გოგოტიშვილი.
ვაჟა გოგოტიშვილი 23 წლის გიგა როყვას მკვლელობაში ბრალდებულია – საქმე ეხება 2022 წელს ოზურგეთში მომხდარ მკვლელობას. გოგოტიშვილი დააკავეს, თუმცა 9 თვეში გაათავსიუფლეს, მიზეზი ნაფიცი მსაჯულების ვერშეკრება იყო.
იმ პერიოდის განმავლობაში ვაჟა გოგოტიშვილის ცოლი ოზურგეთის საკრებულის დეპუტატი იყო – მაშინ მოკლული გიგა როყვას დედამ გაავრცელა ფოტო-მასალა, სადაც ჩანს, როგორც ეხმარებოდა გოგოტიშვილის ოჯახი საარჩევნოდ “ქართულ ოცნებას”. შვილმკვდარი დედა ფიქრობდა, რომ სწორედ “ქართული ოცნება” მფარველობდა გოგოტიშვილს.