ბათუმის კლინიკაში გარდაცვლილი არასრულწლოვნის ოჯახის წევრები და მეგობრები აცხადებენ, რომ სოციალურ ქსელში მუქარის შემცველ შეტყობინებებს იღებენ. მათი თქმით, უცნობი პირები ლუკა ჩხიკვიშვილის გარდაცვალების საქმეზე საჯარო საუბრის შეწყვეტას ითხოვენ და პასუხისმგებლობით ემუქრებიან.
ოჯახი გამოძიებას, ბავშვის სიკვდილში დამნაშავეების გამოვლენასა და დასჯას სთხოვს.
“პიროვნება არის გიორგი ლომია, უბრალოდ, ფეიქი გვერდი აქვს, როგორც ჩანს, გაკეთებული, იმიტომ, რომ მალევე წაშალა. მოკლედ, მუქარის მესიჯებს გვიგზანის, რომ სამართლებრივად თითოეული თქვენგანი აგებთ პასუხს იმაზე, ჩვენ რომ ვაკეთებთ ფეისბუქზე განცხადებებს, ვწერთ, რომ “დაისჯებით” და ა.შ. ჰოდა, ამ პიროვნების დადგენა გვინდა, ვინაა და რას ითხოვს. იმის ნაცვლად, რომ ისინი დაისაჯონ, აქეთ გვეუბნებიან, თქვე დაისჯებითო, თან სამართლებრივი გზითო. ნათესავს ჰონდა გაზიარებული ეს პოსტი და ვისაც კი კომენტარი ჰქონდა გაკეთებული, ყველას ერთი და იგივე ტექსტები მისწერა, რომ “დაისჯებით სამართლებრივი გზით”, – ამბობს ოჯხის წევრი.
მიმდინარე წლის 9 ივნისს გავრცელდა ინფორმაცია, რომ ჩოხატაურის N1 საჯარო სკოლის მეშვიდე კლასის მოსწავლე, ლუკა ჩხიკვიშვილი ოპერაციამდე ნარკოზის შეყვანის შემდეგ კლინიკაში გარდაიცვალა. ოპერაცია მას მ. იაშვილის სახელობის ბათუმის დედათა და ბავშვთა ცენტრალური ჰოსპიტალში უნდა გაეკეთებინა.
მომხდარზე გამოძიება სსკ-ის 116-ე მუხლით დაიწყო, რაც გაუფრთხილებლობით სიცოცხლის მოსპობას გულისხმობს.