მოკლული მასწავლებლის, გიგა ავალიანის დედა, ეკა კუპატაძე აცხადებს, რომ მაქსიმალური სასჯელის მოლოდინი აქვს:
“ჩემი ოჯახი გადაეყარა ძალიან დიდ დანაშაულებრივ ბანდას, რომელიც საშიშია მთელი სახელმწიფოსთვის და მე ნათქვამს ვიმეორებ, რომ მოსამართლეს ამ წუთში აქვს პეპლის ეფექტის ვალდებულება საქართველოს მომავლის მიმართ და დარწმუნებული ვარ ამას კარგად იაზრებს და მოლოდინი მაქვს მაქსიმალური სასჯელის. ესენი მაქსიმალური ვადით უნდა გაარიდონ საზოგადოებას, რომ მსხვერპლი აღარ იყოს სხვა” – ამბობს მოკლული მასწავლებლის გიგა ავალიანის დედა ეკა კუპატაძე.
დღეს მოსამართლე ავალიანის საქმის კიდევ 2 არასრულწლოვანის მიმართ, სასჯელის ვადას გამოაცხადებს. ავალიანის მკვლელობის მომზადებაში ბრალდებული დემეტრე ჩიქოვანი და დანაშაულის შეუტყობინებლობის გამო დაკავებული ანა ნასყიდაშვილი სასამართლომ 27 მაისს დამნაშავედ ცნო.