ვთქვათ, მივყევით იაგოს რჩევას, რომ გვირაბები, ესტაკადები მოვაწყოთ, ქუჩები გავაფართოოთ, ათი წლის შემდეგ რას ვშვრებით? რას ვაფართოებთ? სად ვაკეთებთ ესტაკადას? – ასე უპასუხა კახა კალაძემ ტელეკომპანია „რუსთავი 2“-ის გადაცემა „დებატებში“, პოლიტიკური პარტია „გირჩის“ წევრის, იაგო ხვიჩიას კითხვას.
მისი განცხადებით, როდესაც ოპონენტები მუნიციპალიტეტის მთავრობას მოუწოდებენ ესტაკადების, გვირაბების გაკეთებას ანდა გზების გაფართოებას, ეს ყველაფერი კვლევებზე უნდა იყოს დაფუძნებული, რამდენად მოაგვარებს არსებულ გამოწვევას და მსგავს პროექტებს ხომ არ ექნება მოკლევადიანი ეფექტი.
„ბოლო წლებში ხშირად ვისმენ კრიტიკას ჩვენს სატრანსპორტო პოლიტიკაზე, ჩვენს გადაწყვეტილებებზე, თუმცა ვერ მოვისმინე რა უნდა გაკეთდეს, რა ნაბიჯები გადაიდგას. თქვენ, საუბრობთ, რომ გავაკეთოთ გვირაბები, ესტაკადები, მაგრამ ეს ყველაფერი კვლევებზე დაფუძნებული უნდა იყოს. უნდა არსებობდეს მოდელირება, ამით პრობლემის მოგვარებას რამდენად შევძლებთ. სამწუხაროდ, მეც დამემართა ასეთი რამ – 2017 წელს, მქონდა დაპირება, რომ „ვეფხვი და მოყმის“ მიმდებარედ, საავტომობილო ხიდს გავაკეთებდით. როდესაც დარგის სპეციალისტების ჩართულობით, დავიწყეთ მუშაობა, გაკეთდა მოდელირება, აღმოჩნდა, რომ ეს პროექტი იმ გამოწვევას ვერ უპასუხებდა, რომელიც ამ კონკრეტულ მონაკვეთში არსებობს. როდესაც ჩვენს პოლიტიკას აკრიტიკებთ, უმჯობესია კონკრეტულ კვლევებზე დაფუძნებული გამოსავალი შემოგვთავაზოთ.
მე და ჩემს თანაგუნდელებს არასდროს გაგვიკეთებია მოწოდებები, რომ ყველამ გააჩერეთ ავტომანქანები და საზოგადოებრივი ტრანსპორტით იმგზავრეთ-თქო. ჩვენი პოლიტიკის მთავარი ამოცანაა, რომ ეს ქალაქი იყოს ყველასი, როგორც ფეხით მოსიარულეების, ასევე ავტომანქანით, მოტოციკლეტით, სკუტერით მოსარგებლეებისთვის. გავიხსენოთ, 2017 წლამდე, რამხელა პრობლემა იყო ტროტუარზე ფეხით გადაადგილება. ტროტუარები ავტომანქანების საპარკინგო სივრცედ იყო ქცეული, მათ შორის, კარგი მაგალითია ჭავჭავაძის გამზირი. ჩვენ გადავდგით პოლიტიკური თვალსაზრისით საკმაოდ არაპოპულარული ნაბიჯები, მაგრამ ეს იყო საჭირო და აუცილებელი ჩვენი ქალაქისთვის“, – აღნიშნა კალაძემ.