“ქართულ ოცნებაში” მოფიქრებულმა ახალმა კანონებმა, ტურიზმის სექტორში ყველაფერი თავდაყირა დააყენა. დღეიდან სავალდებულო ხდება გიდების სერტიფიცირება. თუ თქვენ სამთო სათხილამურო ან ალპური გამყოლი ხართ, მოგიწევთ რომ ეს სპეციალური სერტიფიკატითაც დაამტკიცოთ, მაგრამ კითხვები სწორედ აქ ჩნდება. ვერავინ გაიგო რა კრიტერიუმს უნდა აკმაყოფილებდეს ადამიანი, იმისთვის, რომ კვალიფიკაციის კურსი წარმატებით გაიაროს, ვერავინ აგნებს სასწავლო მასალას, ან პროგრამას, რომელიც მათ სერტიფიცირებაში დაეხმარებათ.
ვინც კანონს არ დაემორჩილება დაჯარიმდება. სანქცია ათასი ლარია. რისკების დაზღვევა და ბევრი პროფესიონალი ბაზარზე რა თქმა უნდა კარგია, მით უფრო მაშინ როცა საქმე მაღალი რისკის შემცველ პროფესიებს ეხება, მაგრამ ტურიზმის სექტორში ამბობენ, რომ კანონი ნაჩქარევად არის მიღებული და დეტალებზე ნაფიქრი არ აქვთ. არსებობს ახალი რეგულაცია, მაგრამ არ არსებობს გარდამავალი პერიოდი და უცნობია აღსრულების მექანიზმის შესახებაც.
ძალაში შევიდა კიდევ ერთი აკრძალვა – დღეიდან გიდის საქმიანობა ეკრძალებათ სხვა ქვეყნის მოქალაქეებსაც, მიუხედავად იმისა ექნება თუ არა მათ ქვეყანაში ლეგალურად საქმიანობის უფლება. ანუ თუ ვინმე ქალაქში ტურს ჩაატარებს და ამის სანაცვლოდ თანხას აიღებს, შესაძლოა ავტომატურად კანონდამრღვევად გამოაცხადონ. ტურიზმის სექტორში ფიქრობენ რომ ეს უსამართლო მიდგომაა.