საქართველოს მეხუთე პრეზიდენტმა, სალომე ზურაბიშვილმა ოსლოში, საერთაშორისო ფორუმზე სიტყვით გამოსვლისას საზოგადოებას გააცნო, როგორ მიმდინარეობს ქვეყანაში პროტესტი.
მისი თქმით, 500-ზე მეტი დღეა მიმდინარეობს პროტესტი, მოქალაქეები დგანან ქუჩაში და არ აპირებენ გაჩერდნენ დამოუკიდებლობის და ევროპული მომავლის გზაზე.
ზურაბიშვილმა თქვა, რომ ის, რაც ქვეყანაში ხდება არის რუსეთის მიერ ჩატარებული სპეცოპერაციის, ასევე ჰიბრიდული ომის და გაყალბებული არჩევნების შედეგი.
“ძალაუფლებას ფლობს ერთი ანტიევროპული, ანტიდასავლური და პრორუსული პარტია, რომელიც პირდაპირ ახორციელებს რუსეთის ძირითად ინტერესებს“, – თქვა მან.
“570 დღის შემდეგაც კი, ადამიანები, რომლებსაც ჩემს უკან ეკრანზე ხედავთ, კვლავ ყოველდღე და ყოველ ღამე აპროტესტებენ არსებულ ვითარებას და გააგრძელებენ პროტესტს, რათა დაიცვან საკუთარი დამოუკიდებლობა, დემოკრატიული და ევროპული მომავალი. მათი დევიზია: „ბოლომდე“. ეს მხოლოდ ერთი ქვეყნის დემოკრატიული უკუსვლის ტრაგიკული ისტორია არ არის. ჩემი ქვეყნისთვის ეს ეგზისტენციური საკითხია — „ყოფნა თუ არ ყოფნა“. ამავდროულად, ეს გადამწყვეტი ბრძოლაა დემოკრატიის მომავლისთვის საქართველოს საზღვრებს მიღმაც.
რაც საქართველოში მოხდა, ეს არის გაყალბებული არჩევნების შედეგი. 2024 წელს რუსული პროპაგანდის, რუსული ფინანსური მხარდაჭერისა და რუსული საარჩევნო ტექნოლოგიების დახმარებით, ასევე ადგილობრივი ძალოვანი აპარატის გამოყენებით არჩევნების მიტაცება მოხერხდა. ეს იყო სრულმასშტაბიანი და კარგად დაგეგმილი რუსული სპეცოპერაცია, რომლის ცალკეული ელემენტები უკვე ნანახი გვაქვს სხვა ქვეყნებშიც — მოლდოვა, რუმინეთი, უნგრეთი.
დღეს ამ პროცესის გამოვლინებებს ვხედავთ სომხეთშიც და იმედი მაქვს, რომ შედეგი იქ განსხვავებული იქნება.
დღეს ძალაუფლებას ფლობს ერთი ანტიევროპული, ანტიდასავლური და პრორუსული პარტია, რომელიც პირდაპირ ახორციელებს რუსეთის ძირითად ინტერესებს.
ჩვენ წინააღმდეგობას ვუწევთ ჩუმ მიტაცებას, ჰიბრიდულ ომს, რომელიც დემოკრატიული ინსტიტუტების გამოყენებით მიმდინარეობს” – განაცხადა ზურაბიშვილმა.