მოქალაქე, რომელიც ფეისბუქზე დაწერილი კომენტარის გამო, 2500 ლარი დაჯარიმდა, ამბობს, რომ “ქართული ოცნება“ სოციალური ქსელის კონტროლამდე ნაბიჯ-ნაბიჯ მივიდა.
დიანა გოგოლაძე ის ადამიანია, რომელსაც შსს-ს ახალი სამმართველოს ხელმძღვანელმა ფეისბუქ კომენტარის გამო უჩივლა.
მისი თქმით, ჯერ მოქალქეების გზის გადაკეტვის ჯარიმებით დაიწყეს, შემდეგ სოცქსელების კონტროლზე გადავიდა და ახლა ამას უკვე მასობრივი ხასიათი ექნება.
“შოკი იყო ჩემთვის, რომ ახალგაზრდა გოგო იცქირება ამ ფოტოდან, ასევე ახალგაზრდა პოლიტიკოსი ბიჭი, რომელმაც თავისი აზრი გამოთქვა, რომელიც პროტესტის ფორმა იყო მაშინ, ითხოვდა მის დაპატიმრებას. ცოტა მწარედ, მაგრამ ქვემოთ მივაწერე, როგორ არ გრცხვენია მეთქი, ახალგაზრდა გოგო ხარ და ელემენტარულად მორალი არ გაგაჩნია მეთქი. რამდენიმე ხანი დავმუნჯდი, იმდენად ვერ გავიაზრე, ამ ადამიანს ბოლოს ვეკითხები, თქვენ ცოლ-შვილი გყავთ-მეთქი და მყავსო, მერე ასეთი საქართველოსთვის ოცნებობდით, მეუთხარი, მე სადღაც რაღაც დავწერე, ჩემი აზრი გამოვთქვი რაღაცაზე, რას აკეთებთ. მეოთხე დღეს უკვე სასამართლო მქონდა, დაიწყეს წვეთ-წვეთობით და მივედით აქამდე, ამ ხალხს თუ ჰგონია, რომ აქ ვინმე გაჩერდება, ძალიან ცდება. შინაგანი თავისუფლების მქონე ადამიანი, გამოსავალს ყოველთვის იპოვის, მე ვუთხარი ლელა ცაგარეიშვილს, დახვრეტით ვერ დამხვრეტთ, ძაანაც გინდა, მაგრამ ვერ იზამ და სხვა ახლა რა უნდა გამიკეთო ისეთი, დამიჭირე, არ შემეშინდება, წიგნებს შევიტან და გამოვალ თავისუფალი” – ამბობს დიანა გოგოლაძე.
“ქართულმა ოცნებამ“ შსს-ში ახალი სპეციალური სამმართველო შექმნა, რომლის მთავარი ფუნქციაც “საჯარო სივრცეში სიძულვილის ენის, შეურაცხმყოფელი კამპანიებისა და აგრესიული კომუნიკაციის სისტემური მონიტორინგი და შესაბამისი სამართლებრივი რეაგირება იქნება”.
მდინარაძის ინფორმაციით, აღნიშნულში იგულისხმება ნებისმიერი ტიპის საჯარო კომუნიკაცია, რომელიც შეიცავს სიძულვილის ენას, შუღლის გაღვივებას, ღირსების შელახვას და “სხვა მსგავს ქმედებებს”.